Skoða veggspjaldið Áhrif reykinga á líkamann                   Panta veggspjaldið

Heilinn

 Reykingar hjálpa manni ekki að slappa af. Þvert á móti er stressandi að reykja. Nikótín breytir starfsemi heilans þannig að líkaminn verður háður efninu. Þegar þeir sem reykja segjast slaka á við að reykja eru þeir í raun bara að svala þessari fíkn.

Unglingar verða háðir nikótíni fljótar en þeir sem eldri eru: Innan örfárra sekúndna frá því að tóbaksreykurinn er dreginn að sér er nikótínið komið til heilans. Líkaminn bregst við með því að vilja meir og meir = fólk er orðið fast í nikótínnetinu! Fólk verður háð sígarettum út af því að efni í þeim breyta móttökustöðvum í heilanum. Sumar breytingarnar geta verið varanlegar.

Það hefur sýnt sig að líklegra er að þeir unglingar reyki daglega sem finnst þeir stressaðir, sýna depurð og telja sig fremur stjórnast af umhverfinu en því sem þeir geta sjálfir haft áhrif á.

Augun

Efni í sígarettum skemma viðkvæmt svæði í augunum sem hefur slæm áhrif á sjónina. Sumir verða jafnvel blindir af reykingum. Ótrúlegt en satt.

Húð

Reykurinn í einni sígarettu minnkar súrefnisflæðið til húðarinnar í næstum klukkutíma. Önnur efni í sígarettum skemma líka húðina á ýmsan hátt og tóbaksreykur getur þurrkað húðina. Húð reykingafólks er oft gráleitari og talið er að hún eldist mörgum árum fyrr en húð þeirra sem ekki reykja. Hrukkur myndast t.d. í kringum munninn, hrukkur sem myndast við að sjúga reyknum að sér og blása honum frá sér, og í kringum augnkrókana, því fólk kiprar oft augun svo reykurinn fari síður í þau.

Hár

Reykingar hafa sýnileg áhrif á hárið. Tóbaksnotkun hindrar eðlilega blóðrás líkamans og þar með til hársins. Þetta hefur m.a. þau áhrif að hár fólks sem notar tóbak skemmist, þynnist og gránar fyrr en þeirra sem ekki nota tóbak.

Munnur

Það er ekki góð lykt út úr þeim sem nota tóbak og flestir vita að tennur dökkna og gulna út af reykingum (sjá mynd). En kannski vita ekki allir að langtímareykingar leiða líka af sér tannlos og sjúkdóma í tannholi. Munntóbakið skemmir m.a. slímhimnuna í munninum og tannrótina, ef hún er orðin ber 

(Skoða myndband um tannlos).

(Skoða ,,munntóbaksleikinn" )

Háls og vélinda

Reykingar auka líka líkurnar á því að fá krabbamein í munni, hálsi og vélinda. 

Lungun

Eiturefni safnast fyrir í lungunum við reykingar. Sérstakar frumur í lungunum reyna að vinna á eiturefnunum en drepast í tóbaksreyknum. Reykingahósti stafar af þessum skemmdum.

Tjaran í sígarettum skemmir líka frumur í loftgöngunum, svo bifhárin þar geta ekki sópað burt skaðlegum efnum. Á löngum tíma geta þessar skemmdir hrint af stað óstjórnlegum frumuvexti sem leiðir af sér krabbamein í lungunum eða barkakýli. Langflest tilfelli ungnakrabbameina stafa af reykingum.

Þol þeirra sem reykja minnkar vegna þess að lungun starfa ekki almennilega og líkaminn fær því minna súrefni.

Hjarta og æðar

 Nikótínið í sígarettum fær hjartað til að slá hraðar og blóðþrýstingurinn snarhækkar. Það er nikótínið sem hefur þessi slæmu áhrif á taugakerfið. Í tóbaksreyk er líka koleinoxíð sem er sama efni og kemur úr púströrum bíla. Það minnkar getu blóðsins til að flytja súrefni og eykur álagið á hjartað.

Til lengri tíma litið þá stórauka reykingar hættuna á að fá hjartaáfall.

Meltingarkerfi

Áhrif reykinga á meltingarfærin eru merkilega mikil. Reykingar geta valdið meltingartruflunum, magasári og brjóstsviða. Því lengur sem maður reykir, því meiri líkur eru á að fá alvarlega sjúkdóma, s.s. krabbamein í maga.

Vöðvar

Efni í sígarettum valda því að æðarnar dragast saman og þrengjast. Minna súrefni flyst þá um líkamann sem hefur þau áhrif að vöðvarnir verða minni og slappari. Það hefur að sjálfsögðu áhrif á alla íþróttaiðkun.

  Lifandi efni um áhrifin á líkamann

Tengillinn hér er í lifandi fræðsluefni á ensku um áhrif tóbaks á líkamnn þar sem hægt er að sjá á myndrænan hátt hvað getur gerst. Sumar myndirnar geta haft mjög sterk áhrif á áhorfandann. (Tengillinn er í efni á vefsíðu Centers for Disease Control and Prevention.)