Fráhvörf

Einkenni sem geta komið fram eftir (langvarandi) notkun vímuefna eða lyfja eru m.a. kvíði, einkenni þunglyndis, svitaköst, svefntruflanir, aukinn hjartsláttur, krampar, kviðverkir og skjálfti.

Fráhvarfseinkennum má ekki rugla saman við eftirköst eftir mikla drykkju eitt kvöld. Slík eftirköst eru vegna eituráhrifa áfengis og einkennast af höfuðverk og ógleði og ertingu frá meltingarvegi ef drukkið var óblandað sterkt áfengi. Fráhvörf er allt annars eðlis og verða vegna þess að heilinn hefur aðlagað sig stöðugu áfengismagni. Sé drykkju hætt er heilastarfsemin sett úr jafnvægi í 1 til 3 daga. Fráhvarfseinkenni frá áfengi eru venjulega skjálfti, óróleiki og ofstarfsemi á adrenerga hluta sjálfráða taugakerfisins sem meðal annars kemur fram í hröðum hjartslætti og háum blóðþrýstingi. Alvarlegri fráhvarfseinkenni eru krampar, ofskynjanir eða titurvilla (Delerium tremens).

Heimildir:

Rafn M. Jónsson, Lýðheilsustöð,
vefur SÁÁ   http://www.saa.is/islenski-vefurinn/fraedsluefni/afengi/   (tekið 6. jan.2009)