Hreyfing - Öryggi | Heilsueflandi grunnskólar | Skólafræðsla | Lýðheilsustöð

Hreyfing - Öryggi

Allir þurfa á daglegri hreyfingu að halda óháð aldri, kyni, holdafari, andlegri eða líkamlegri getu. Með því að skapa öruggar aðstæður, sem takmarka langvarandi kyrrsetu og styðja bæði nemendur og starfsfólk skóla til daglegrar hreyfingar, má leggja grunninn að því að sem flestir fullnægi sinni daglegu hreyfiþörf. Með aðstæðum er bæði vísað til ýmiss konar starfs sem fram fer í tengslum við skólann og til þeirrar aðstöðu sem starfinu er búin, bæði innan- og utandyra, með tilliti til hreyfingar og öryggis.

Auk ýmiss konar ávinnings fyrir heilsuna er hreyfing nemenda m.a. tengd betri einbeitingu og meiri afköstum, betri hegðun, minni truflunum á kennslu og betri námsárangri. Vinnustaðir sem stuðla að reglulegri hreyfingu starfsfólks eru auk þess líklegir til að uppskera m.a. þrekmeira og heilsuhraustara starfsfólk, færri veikindadaga, bætt samskipti, meiri starfsánægju, öflugri liðsheild og minni starfsmannaveltu.

Öruggt skólaumhverfi, sem stuðlar að daglegri hreyfingu nemenda og starfsfólks, er því sannarlega til þess fallið að stuðla að árangursríkri kennslu og námi í grunnskólum.

Hér verður aðgengilegt margskonar stuðningsefni um hreyfingu og öryggi fyrir Heilsueflandi grunnskóla, auk nýjustu uppfærslu viðkomandi blaðsíðna í handbókina fyrir heilsueflandi grunnskóla.

Kafli handbókarinnar um hreyfingu og öryggi (pdf-skjal, nóv 2010), með fyrirvara um síðari breytingar í ljósi reynslu og ábendinga.