Reykingar og heilsa
Í stuttu máli má segja að tóbaksneysla flýti öldrunarferlinu í flestum vefjum og líffærum líkamans. Tóbak hefur truflandi áhrif á ýmsa mikilvæga líkamsstarfsemi, dregur smám saman úr þoli og skerðir viðnám gegn veikindum. Það veldur ótímabærri hrörnun líkamans og getur valdið lífshættulegum sjúkdómum, svo sem krabbameini, hjarta- og æðasjúkdómum og langvinnum lungnasjúkdómum.
Reykingar urðu ekki almennar fyrr en skömmu fyrir fyrri heimsstyrjöldina og hér á landi ekki fyrr en á árum síðari heimsstyrjaldar. Samfara þessari geysimiklu aukningu reykinga hefur risið alvarlegt heilbrigðisvandamál. Undanfarna áratugi hefur verið sýnt fram á með margvíslegum vísindalegum rannsóknum að reykingar eiga sök á sjúkdómum sem valdið geta ótímabærri örorku, og jafnvel dauða, og ennþá bætist við þann sjúkdómaflokk sem rekja má að einhverju leyti til reykinga.