Reyklausir veitingastaðir - undirbúningur hafinn
Allir veitinga- og skemmtistaðir á Íslandi verða reyklausir frá og með 1. júní nk. skv. lögum. Þegar er hafin vinna við að undirbúa rekstraraðila undir þessa breytingu, m.a. lét Lýðheilsustöð útbúa kynningarbækling um málið, í samstarfi við Samtök ferðaþjónustunnar, og sendi nýverið til allra veitingahúsa á landinu.Samþykktar hafa verið á Alþingi breytingar á tóbaksvarnalögum sem fela það í sér að veitinga- og skemmtistaðir mega ekki leyfa reykingar í þjónusturými sínu eftir 1. júní 2007. Samtök ferðaþjónustunnar og hagsmunasamtök starfsfólks í veitingarekstri eru meðal þeirra sem hvöttu til lagabreytingarinnar.
Hreint loft á veitingastöðum – fyrir gesti sem starfsfólk
Sem lið í að undirbúa jafnt rekstraraðila sem landsmenn undir það sem í vændum er lét Lýðheilsustöð, í samvinnu við Samtök ferðþjónustunnar, útbúa kynningarefni um málið. 
Um er að ræða bækling þar sem skýrt er frá því helsta sem breytingin á tóbaksvarnalögunum felur í sér, fjallað örlítið um reynslu annarra þjóða af sams konar breytingum og leitast við að svara algengustu spurningum um málið.
Auk bæklingsins voru gefnir út tvenns konar límmiðar sem veitingamenn geta límt í glugga veitingastaðanna. Annars vegar er límmiði um að staðurinn sé reyklaus, hins vegar að hann verði reyklaus 1. júní 2007. Á árinu 2007 mun Lýðheilsustöð halda áfram með kynningarstarf í tengslum við lagabreytinguna, þannig að jafnt rekstraraðilar sem landsmenn allir fái sem bestar upplýsingar um þær breytingar sem verða á veitinga- og skemmtistöðum í kjölfarið. 
Panta efni
Hægt er að panta bæklinginn og límmiðana í gegnum heimasíðuna.