Brugðist við gjöf á sígarettum með bíómiða
Ábending barst um að útvarpsstöðin XFM væri að gefa boðsmiða á forsýningu bíómyndarinnar Thank you for smoking ásamt sígarettu og skilyrði fyrir því að fá að fara á sýninguna væri að reykja sígarettuna. Lýðheilsustöð kannaði málið og viðurkenndi útvarpsstöðin að þetta væri rétt og að þar á bæ teldu menn sig ekki vera að gera neitt rangt. Lýðheilsustöð benti á að væntanlega væri þarna um brot á tóbaksvarnalögum að ræða.
Lýðheilsustöð leitaði álits lögfræðings á málinu og benti hann á að samkvæmt 1. mgr. 7. gr. tóbaksvarnarlaga nr. 6/2002 eru hvers konar auglýsingar á tóbaki bannaðar hér á landi með ákveðnum þröngum undantekningum. Álitaefnið hér væri ekki hvort auglýsingar á tóbaki væru bannaðar heldur hvort háttsemi útvarpsstöðvarinnar hafi falið í sér auglýsingu í skilningi laganna. Í 3. mgr. 7. gr. laganna er hugtakið „auglýsing“ skilgreint sem:
- hvers konar tilkynningar til almennings eða sérstakra markhópa, þar á meðal vörukynningar, útstillingar í gluggum verslana, hvers konar skilti og svipaðan búnað,
- alla notkun hefðbundinna tóbaksvörumerkja (heita og auðkenna) eða hluta þeirra; undanskildar eru þó vörur sem framleiddar eru undir slíkum merkjum, enda gilda auglýsingatakmarkanir laganna um þær að öðru leyti,
- hvers konar umfjöllun í fjölmiðlum um einstakar vörutegundir til annars en að vara sérstaklega við skaðsemi þeirra,
- dreifingu vörusýna til neytenda.
Í 2. mgr. ákvæðisins segir ennfremur:
Bannað er enn fremur að sýna neyslu eða hvers konar meðferð tóbaks eða reykfæra í auglýsingum eða upplýsingum um annars konar vöru eða þjónustu og í myndskreytingu á varningi.
Umhverfissvið Reykjavíkurborgar fer með eftirlit með þessari grein tóbaksvarnalaganna og því hefur verið gert viðvart um málið.