Reykleysi gengur vel í Noregi
Í Noregi, sem og annars staðar, þar sem lagasetning um reyklausa veitinga- og skemmtistaði hefur komið til tals hafa heyrst ólík sjónarmið um hvernig þetta mundi ganga. Sumir spáðu algjörri ringulreið fyrir utan skemmtistaði með minnkandi veltu staðanna. Aðrir áttu von á því að almenningur mundi virða lagasetninguna að vettugi. Þessar spár hafa hins vegar ekki gengið eftir. Þegar almenningur, starfsfólk og eftirlitsaðilar eru spurðir kemur í ljós að lítið hefur verið um vandamál. Flestir virða lögin (eða um 90%), flestir telja lagasetninguna hafa heppnast vel (um 77%) og sífellt fleiri eru hlynntir reyklausum veitinga- og skemmtistöðum (58% nú í stað 47% áður).
Þegar efnahagsleg áhrif lagasetningar eru skoðuð kemur í ljós að sala á bjór hefur dregist lítillega saman en lítill munur er á veltu veitinga- og skemmtistaða fyrir og eftir.
Tilgangur lagasetningar um reyklausa veitinga- og skemmtistaði snýst fyrst og síðast um að bæta vinnuumhverfi þeirra sem þar vinna. Það er því gleðilegt að sjá að norskar rannsóknir sem gerðar voru á starfsmönnum veitinga- og skemmtistaða fyrir og eftir að lögin tóku gildi sýna greinilega breytingu til batnaðar á gæðum þess lofts sem fólkið vinnur í. Einnig sögðust færri starfsmenn finna fyrir almennum heilsufarsvandamálum s.s. höfuðverk, ertingu í augum og þurrk í hálsi, færri fundu fyrir vandamálum í öndunarfærum og um 10% starfsmanna hafa hætt að reykja.