ÞITT ER VALIÐ - tannverndarvika 2011
Fyrsta vikan í febrúar ár hvert er helguð tannvernd og í ár er áhersla lögð á glerungseyðingu og hvernig stemma megi stigu við henni.
Af því tilefni hefur Lýðheilsustöð gefið út veggspjaldið Þitt er valið þar sem lýst er á myndrænan hátt innihaldi algengustu vatns-, ávaxta- og gosdrykkja á markaðnum og áhrifum innihaldsins á tannheilsu.
Einnig hefur verið gefið út fræðslumyndband um umhirðu tanna barna, jafnt ungra sem þeirra eldri, og það talsett á ensku, rússnesku og pólsku, auk íslensku. Nýtt fræðsluefni er svo gjarnan gert fyrir leikskólabörn og yngstu börnin í grunnskóla í tannverndarvikunni og hefur það verið sent til allra leikskóla á landinu.
Eitt af hlutverkum Lýðheilsustöðvar er að fræða og veita fólki upplýsingar um það sem hefur áhrif á heilsu. Í tannverndarvikunni í ár var ákveðið að beina sjónunum fólks að innihaldi drykkjarvara og áhrifum þess á glerungseyðingu – ekki síst hjá börnum og ungmennum en unglingar drekka t.d. mjög mikið af gosdrykkjum. Samkvæmt könnun RÍN (2003-2004) drekka 9 ára börn að meðaltali tæplega 2,5 lítrar á viku af gosdrykkjum og sætum svaladrykkjum og 15 ára unglingar tæplega 4 lítrar á viku.
Upplýsingarnar á veggspjaldinu eru settar fram á myndrænan hátt þannig að sem flestir skilji þær, jafnvel þeir sem ekki kunna íslensku til fullnustu, sem og til að hjálpa fólki að muna hvað er í hverjum drykk þegar kemur að því að velja sér drykkjarvöru. Veggspjaldið, sem er í A2 stærð, er hægt að panta eða prenta út í A4 stærð.
Tengt efni:
Bragðbættir vatnsdrykkir - eru þeir hollir?
Mikilvægt að fylgjast með koffínneyslu barna og unglinga
Glerungseyðing – vaxandi vandi íslenskrar æsku
Hvað borða íslensk börn og unglingar?
Heilsa og líðan skólanema 2006 (bls. 28)
Hvað hentar börnum best að drekka?
Nammidagur – hugum að sykurmagninu
Mikilvægt að fylgjast með koffínneyslu barna
Fræðsla um tannvernd barna á myndböndum
Eyddur tannglerungur kemur aldrei aftur og því afar mikilvægt að veita upplýsingarnar um það sem getur skaðað glerunginn. Veggspjaldið er liður þar í. En tannheilsa barna á Íslandi er ekki nógu góð og margt þarf að koma til svo bæta megi þar úr. Almenna umhirða tanna barna þarf að bæta og almennt skortir á að börn komi reglulega í eftirlit til tannlæknis. Lýðheilsustöð hefur látið gera myndband um tannvernd barna þar sem farið er yfir þau atriði sem hafa þarf í huga við umhirða á tönnum barna og ungmenna. Þess er vænst að sem flestir foreldrar kynni sér efnið og tileinki sér þar sem þar er kennt, og komi þannig í veg fyrir tannskemmdir hjá börnum sínum og stuðla að góðri tannheilsu þeirra allt lífið.
Komið hefur í ljós að tannheilsa barna innflytjenda er oft verri en annarra barna á Íslandi og því hefur fræðsluefnið verið talsett á ensku, rússnesku og pólsku, auk íslensku. Auðvelt er að nálgast efnið því hægt er að horfa á það í gegnum vefsíðu Lýðheilsustöðvar auk þess sem hægt er að panta DVD-disk með efninu á íslensku og ensku. Upplýsingum um efnið hefur verið miðlað til allra leik- og grunnskóla, heilsugæslustöðva, tannlæknastofa og annarra staða sem að gagni kunna að koma og viðkomandi beðnir að vekja athygli foreldra á því.
Til að auðvelda notkun er fræðsluefninu skipt í kafla:
1. Yngri en 3 ára
2. 3-6 ára
3. 6-12 ára
4. Tannskemmdir
5. Áhættuhópar.
Yngstu börnin
Árlega er útbúið nýtt fræðsluefnið fyrir tannverndarviku sem hentar yngstu aldurshópunum. Að þessu sinni var gert nýtt veggspjald um tannvernd til að hengja upp á leikskólum og barmnælur með sömu myndum og eru á veggspjaldinu. Jafnframt voru útbúnar myndir til að lita, sem allir geta nálgast í gegnum vefsíðu Lýðheilsustöðvar. Veggspjaldið var einnig sent til skóla og þeim boðið að panta eintök til að hengja upp í stofum yngstu barnanna.
Fyrir foreldra
Auk fræðslumyndbandanna um tannhirðu barna voru slíkar upplýsingar settar upp á A4 blað sem leikskólar eru beðnir að hengja upp sem og að senda foreldrum í tölvupósti, en þeir geta þá prentað blaðið sjálfir og hengt upp heima við.
Umfjöllun í fjölmiðlum um efni tannverndarviku
Kastljós 28.1.2011
Fréttablaðið 29.1.2011
visir.is 31.1.2011
Mbl.is 31.1.2011
ÍNN - Heilsuþáttur Jóhönnu 31.1.2011