Lýðheilsustöð - Næring og holdafar

Breytingar á fæðuvenjum Íslendinga

Fri, 29 Apr 2011 10:28:00 +0000

Fæðuvenjur Íslendinga hafa breyst samfara minni kaupmætti og hækkuðu verðlagi. Minni neysla er á þeim matvörum sem hafa hækkað hvað mest í verði og eins þeim sem ekki teljast til brýnna nauðsynja. Hugsanleg heildaráhrif á heilsu þjóðarinnar eru ekki augljós þar sem bæði neysla hollustuvara svo og sætinda og skyndibita hefur minnkað.

Málþing um mat í skólamötuneytum

Wed, 6 Apr 2011 08:42:00 +0000

Málþing um mat í skólamötuneytum verður haldið 6. apríl kl. 15:00 að Stórhöfða 31 (gengið inn að neðanverðu). Þingið er haldið á vegum MATVÍS en Hólmfríður Þorgeirsdóttir, verkefnisstjóri næringar hjá Lýðheilsustöð heldur erindi sem hún byggir á efni handbókar Lýðheilsustöðvar fyrir skólamötuneyti.

Hámarks magn transfitusýra í matvælum

Mon, 4 Apr 2011 09:19:00 +0000

Í nýrri reglugerð sjávarútvegs- og landbúnaðarráðherra, sem tekur gildi 1. ágúst n.k., er kveðið á um hámarksmagn transfitusýra í matvælum. Samkvæmt reglugerðinni er óheimilt er að markaðssetja matvæli sem innhalda meira en 2 grömm af transfitusýrum í hverjum 100 grömmum af heildarfitumagni og er þetta gert að fyrirmynd Dana. Reglugerðin gildir um transfitusýrur sem myndast þegar olía er hert að hluta en gildir hins vegar ekki um transfitusýrur sem eru í dýrafitu frá náttúrunnar hendi.

Stöndum vörð um hollustu og gæði skólamáltíða

Mon, 28 Mar 2011 08:59:00 +0000

Í ljósi umræðu um niðurskurð í grunnskólum landsins vekur Lýðheilsustöð athygli á mikilvægi þess að staðið sé vörð um gæði skólamáltíða. Skólamáltíðir eru lögbundin þjónusta samkvæmt 23. grein grunnskólalaga nr. 91 frá 2008 . Samkvæmt lögunum skulu nemendur eiga kost á málsverði á skólatíma í samræmi við opinber manneldismarkmið.

Fjölbreytt fæði getur dregið úr líkum á sjúkdómum

Thu, 24 Mar 2011 14:10:00 +0000

Heilsunnar vegna skiptir fjölbreytt og hollt fæði, í hæfilegu magni, afar miklu máli. Lýðheilsustöð-manneldisráð gáfu árið 2006 út ráðleggingar um mataræði og næringarefni, en með því að fylgja ráðleggingunum má draga úr líkunum á ýmsum langvinnum sjúkdómum.

Lýðheilsustöð styður upptöku skráargatsins

Tue, 22 Feb 2011 11:22:00 +0000

Lýðheilsustöð, sem meðal annars hefur því hlutverki að gegna að stuðla að bættu mataræði þjóðarinnar, hefur frá upphafi stutt það að Ísland taki upp samnorrænt hollustumerki, skráargatið, og verði með í frekari þróun á þessu merki.

Lýðheilsustöð óskar landsmönnum gleðilegrar hátíðar - njótum hennar á heilbrigðan hátt

Wed, 22 Dec 2010 12:01:00 +0000

Vel er hægt er að njóta hátíðarinnar og allra jólakræsinganna án þess að það þurfi að hafa slæm áhrif á heilsuna. Í léttum jólapistli er bent á auðveldar leiðir til þessa - og hvatt til hreyfingar og slökunar inn á milli.

Könnun á mataræði Íslendinga

Fri, 10 Sep 2010 16:36:00 +0000

Lýðheilsustöð og Matvælastofnun í samvinnu við Rannnsóknastofu í næringarfræði við Háskóla Íslands eru um þessar mundir að hefja könnun á mataræði og neysluvenjum landsmanna. Um tvö þúsund manns á aldrinum 18-80 ára geta því átt von á bréfi með beiðni um þátttöku, en könnunin fer þannig fram að haft verður samband við þátttakendur símleiðis og spurt um mataræði og neysluvenjur.

Samningur um landskönnun á mataræði Íslendinga

Tue, 22 Jun 2010 15:25:00 +0000

Undirritaður var í dag samstarfssamningur Lýðheilsustöðvar, Matvælastofnunar (MAST) og Rannsóknastofu í næringarfræði (RÍN) um framkvæmd Landskönnunar á mataræði Íslendinga.

Margar góðar ástæður fyrir því að borða 5 skammta af grænmeti og ávöxtum á dag

Tue, 13 Apr 2010 13:59:00 +0000

Í tenglsum við niðurstöðu nýrrar rannsóknar vill Lýðheilsustöð koma á framfæri að margar góðar ástæður eru fyrir því að borða 5 skammta af grænmeti og ávöxtum á dag.

Ný handbók fyrir framhaldsskóla

Mon, 22 Mar 2010 16:17:00 +0000

Handbók um mataræði í framhaldsskólum

er komin út á vegum Lýðheilsustöðvar. Handbókin er gefin út í tengslum við verkefnið Heilsueflandi framhaldsskóli og er ætluð sem stuðningur við skólann í vinnu sinni við að stuðla að hollu mataræði nemenda og starfsfólks.

Upplýsingar um transfitusýrur

Wed, 24 Feb 2010 14:45:00 +0000

Nýlega var greint frá niðurstöðum nýrra greininga á transfitusýrum í völdum matvælum á Íslandi. Lýðheilsustöð hefur í kjölfarið tekið saman smá fróðleik um transfitusýrur sem hægt er að skoða hér.

Fitusýrur í matvælum - ný greining

Thu, 28 Jan 2010 14:09:00 +0000

Á árunum 2008 og 2009 voru gerðar hjá Matís ohf fitusýrugreiningar á 51 sýni af matvörum í þeim tilgangi að uppfæra gögn í ÍSGEM gagnagrunninum um efnainnihald matvæla. Verkefnið var unnið í samstarfi við Lýðheilsustöð og Matvælastofnun. Áhersla var lögð á að kanna magn trans-fitusýra í unnum matvælum og því voru tekin sýni af borðsmjörlíki, bökunarvörum, djúpsteikingarfeiti, mat frá skyndibitastöðum, ís, kexi, snakki og sælgæti.

Tillögur um framboð á matvörum í íþróttamannvirkjum

Mon, 18 Jan 2010 15:39:00 +0000

Lýðheilsustöð hefur gefið út fræðsluefnið Tillögur um framboð á matvörum í íþróttamannvirkjum og hjá íþróttafélögum en markmiðið með útgáfunni er að stuðla að hollri næringu íþróttaiðkenda. Íþróttabandalag Reykjavíkur (ÍBR), Íþrótta- og tómstundaráð Reykjavíkur (ÍTR) og Íþróttasamband Íslands (ÍSÍ) standa að kynningu á efninu ásamt Lýðheilsustöð.

Mikilvægt að fylgjast með koffínneyslu barna og unglinga

Mon, 18 Jan 2010 10:54:00 +0000

Í ljósi þess að talsvert framboð er nú af drykkjarvörum og öðrum matvælum sem innihalda koffín telur Lýðheilsustöð ástæðu til að hvetja foredra og aðra til að fylgjast vel með koffínneyslu barna og unglinga. Koffín veldur útvíkkun æða, örari hjartslætti og auknu blóðflæði til allra líffæra. Einnig hefur koffín áhrif á öndun, meltingu og þvagmyndun. Mikil neysla á koffíni getur valdið höfuðverk (sem er líka fráhvarfseinkenni), svima, skjálfta, svefnleysi, hjartsláttartruflunum og kvíða.

Fæðuframboð á Íslandi 2008 - Verulegur samdráttur á ávöxtum og grænmeti

Mon, 11 Jan 2010 09:27:00 +0000

Tölur um fæðuframboð á Íslandi fyrir árið 2008.
Lýðheilsustöð birtir reglulega upplýsingar um fæðuframboð á Íslandi og þó þær veiti ekki beinar upplýsingar um neyslu gefa þær vísbendingar um þróun á mataræði þjóðarinnar.

Mataræði á nýju ári

Wed, 6 Jan 2010 10:00:00 +0000

Í upphafi árs leiða margir hugann að því hvað þeir geti gert til að stuðla að bættu heilsufari. Einn þáttur sem tengist heilsu og við getum haft áhrif á er mataræðið en með góðu fæðuvali má draga úr líkunum á ýmsum sjúkdómum. Það er því ekki úr vegi að rifja upp ráðleggingar Lýðheilsustöðvar – manneldisráðs um mataræði og nærignarefni en markmiðið með þeim er meðal annars að draga úr líkunum á ýmsum sjúkdómum og stuðla að sem bestri líðan landsmanna.

Hvað borða íslensk börn á leikskólaaldri?

Fri, 30 Oct 2009 11:36:00 +0000

Komin er út skýrsla með niðurstöðum könnunar á mataræði 3ja og 5 ára barna á höfuðborgarsvæðinu árið 2007. Rannsóknastofa í næringarfræði (RÍN) og Lýðheilsustöð stóðu að rannsókninni en hún var unnin af RÍN 2007-2008. Rannsóknin leiddi í ljós bæði jákvæðar og neikvæðar hliðar á mataræði barnanna, s.s. að fiskneysla væri í samræmi við ráðleggingar en langt væri í land með ávaxta- og grænmetisneyslu.

Líkamsþyngd og holdafar fullorðinna Íslendinga frá 1990-2007

Mon, 28 Sep 2009 12:31:38 +0000

Lýðheilsustöð kynnti í dag niðurstöður rannsóknar sinnar á líkamsþyngd og holdafari fullorðinna Íslendinga og á sama tíma kom út skýrsla um rannsóknina.

Nýtt fræðsluefni um næringu barna - fyrir dagforeldra og ungbarnaleikskóla

Mon, 21 Sep 2009 09:31:13 +0000

Út er komið hjá Lýðheilsustöð nýtt fræðsluefni: Ráðleggingar um næringu barna, fyrir dagforeldra og starfsfólk ungbarnaleikskóla. Tilgangurinn með útgáfunni er að auðvelda þessum aðilum að gefa börnunum hollan og góðan mat við þeirra hæfi.

Síðdegishressing fyrir börnin á frístundaheimilum

Fri, 15 May 2009 03:06:46 +0000

Nauðsynlegt er fyrir börn, sem dvelja á frístundaheimilum eftir að skóladegi lýkur, að fá staðgóða hressingu síðdegis. Lýðheilsustöð og nemar í lýðheilsu-næringarfræði við HÍ könnuðu hvernig næringarmálunum væri háttað í frístundaheimilum á öllu landinu og niðurstaða könnunarinnar leiddi í ljós að flest þeirra bjóða börnunum síðdegishressingu. Aftur á móti mættu frístundaheimilin bæta sig í því að fara að ráðleggingum Lýðheilsustöðvar um fæðuval í síðdegishressingu.

Samstarf við bakara um minna salt í brauðum

Wed, 29 Apr 2009 02:40:45 +0000

Lýðheilsustöð hefur hvatt bakara landsins til að draga úr salti í brauðum, sem margir hafa þegar gert. Þetta er liður í að stuðla að minni saltneyslu landsmanna, sem heilsunnar vegna er of mikil. Landsmenn borða talsvert af brauði, þótt neysla grófs brauðs mætti vera meiri, og með því að minnka saltmagnið geta bakarar lagt sitt af mörkum til bættrar heilsu landsmanna.

Brjóstamjólk besta næringin fyrir ungbörn

Mon, 23 Mar 2009 15:27:10 +0000

Fyrir skömmu birtust fréttir um að danskir vísindamenn, sem mælt hafa eiturefni í brjóstamjólk, teldu ekki ráðlegt að gefa börnum hana eftir fjögurra mánaða aldur. Þetta gengur þvert á ráðleggingar danskra heilbrigðisyfirvalda sem vísa þessu á bug. Landlæknisembættið, Lýðheilsustöð og Miðstöð heilsuverndar barna leggja mikla áherslu á að brjóstamjólk sé besta næring fyrir ungbörn enda er talið að kostir móðurmjólkur sem helsta næring barna á fyrsta ári vegi miklum mun þyngra en gallar.

Fæðuframboð á Íslandi 2007- Aukning á ávöxtum og grænmeti en einnig harðri fitu

Tue, 17 Feb 2009 04:21:19 +0000

Lýðheilsustöð hefur birt tölur um fæðuframboð á Íslandi fyrir árið 2007 hér á heimasíðunni. Þessar upplýsingar eru unnar reglulega og þótt þær veiti ekki upplýsingar um neyslu gefa þær vísbendingar um þróun á mataræði þjóðarinnar.

Borðum fisk á nýju ári

Mon, 5 Jan 2009 14:52:22 +0000

Nú þegar jól og áramót eru að baki, með tilheyrandi stórsteikum og öðrum orkuríkum mat, er um að gera að fagna nýju ári með því að hafa fisk á borðum. Fiskur er nefnilega heilsusamlegur matur fyrir alla aldurshópa.

Auðvelda valið verði holla valið

Wed, 12 Nov 2008 09:36:51 +0000

Hluti af fræðslustarfi Lýðheilsustöðvar er að miðla upplýsingum um hollustu matvæla í þeim tilgangi að auðvelda fólki að velja það sem er hollara fyrir heilsuna framyfir það sem talist getur óhollara. Liður þar í eru fastir pistlar í Morgunblaðinu sem bera heitið Hollráð um heilsuna. Í þessri viku er fjallað um vatn og bragðbætta vatnsdrykki og áhrif þeirra á tannheilsu, ef einhver eru.

Síðdegishressing í eftirskólum og á frístundaheimilum

Tue, 11 Nov 2008 14:02:16 +0000

Nauðsynlegt er fyrir börn að fá síðdegishressingu og þar þarf að hafa heilsu barnanna í huga, bæði til skamms og langs tíma litið. Til hægðarauka fyrir starfsfólk þá hefur Lýðheilsustöð gefið út ráðleggingar um hvers konar mat sé æskilegt að bjóða sem síðdegishressingu í eftirskólum og frístundaheimilum sveitarfélaganna.

Af bestu lyst 3 - hollt, gott og girnilegt

Mon, 3 Nov 2008 14:35:36 +0000

Út er komin matreiðslubókin Af bestu lyst 3 en Lýðheilsustöð, Hjartavernd og Krabbameinsfélagið unnu með bókaforlaginu Vöku-Helgafelli að útgáfu bókarinnar. Nanna Rögnvaldardóttir, sem er landsþekkt fyrir mataruppskriftir sínar, valdi uppskriftirnar í þessa bók en eins og í fyrri bókunum, Af bestu lyst 1 og 2, fara hér saman uppskriftir að hollum og góðum mat sem jafnframt er girnilegur og spennandi.

Munum eftir þorskalýsinu - ein teskeið á dag

Wed, 29 Oct 2008 09:35:25 +0000

Nú þegar vetur er genginn í garð og sól lækkar á lofti er vert að minna á nauðsyn þess að fá sér daglega 1 teskeið (5 ml) af þorskalýsi eða annan D-vítamíngjafa.

Lykillinn að hollum skólamat - handbækur fyrir leikskólaeldhús og grunnskólamötuneyti

Mon, 25 Aug 2008 09:49:44 +0000

Nú þegar líða tekur að hausti og grunnskólar og leikskólar eru að fara í gang eftir sumarfrí vill Lýðheilsustöð minna á hve mikilvægt er að sá matur sem börnum og unglingum stendur til boða sé hollur og næringarríkur. Lýðheilsustöð mælir með því að eldhús í grunn- og leikskólum nýti sér Handbók fyrir skólamötuneyti eða Handbók fyrir leikskólaeldhús sem Lýðheilsustöð gaf út.