Aðgerðaáætlun WHO um næringu, hreyfingu og heilsu
Þar með beindi stofnunin sjónum heims að ótvíræðu vægi góðrar fæðu og hreyfingar fyrir lýðheilsu. Í aðdraganda samþykktarinnar urðu að vísu allsnarpar umræður, ekki síst vegna harðorðra mótmæla einstakra matvælaframleiðenda, og þá helst framleiðenda sykraðra vara, sem þóttu að vörum sínum vegið. Þegar upp var staðið náðist þó samstaða um skýra áætlun, þar sem tekin er afdráttarlaus afstaða til mikilvægis hollrar fæðu og nægrar hreyfingar fyrir lýðheilsu. Í áætluninni er hvatt til aukinnar neyslu á grænmeti, ávöxtum, hnetum og baunum, og hóflegarar neyslu sykurs, salts og mettaðrar fitu, ásamt daglegri hreyfingu í a.m.k. 30 mínútur á dag. Eins er þar brýnt fyrir þjóðum heims að bregðast við offitufaraldrinum sem breiðist út um víða veröld, ekki aðeins meðal ríkra þjóða, heldur einnig fátækra þróunarríkja. Í aðdraganda samþykktarinnar fékk Alþjóðaheilbrigðismálastofnun helstu sérfræðinga heims til vinna ítarlega skýrslu um stöðu þekkingar á sviði næringar, hreyfingar og heilsu (Diet, nutrition and the prevention of chronic diseases). Þar kemur m.a. fram að langvinnir sjúkdómar valdi um það bil 60% allra dauðsfalla í heiminum og 46% af sjúkdómabyrði. Holl næring og næg hreyfing eru þeir umhverfisþættir sem vega hvað þyngst í baráttunni við þessa sjúkdóma.