Litarefni og ofvirkni
Niðurstöður rannsóknarinnar eru birtar á vef vísindatímaritsins Lancet en þar kemur fram að börnum voru gefnar ákveðnar blöndur af litarefnum og rotvarnaefninu Natríumbensóat (E 211).
Rannsökuð voru litarefnin Tartrasín (E 102), Kínólíngult (E 104), Sunset yellow FCF (E 110), Asórúbín (E 122), Ponceau 4R (E 124) og Allúra rautt AC (E 129). Öll þessi efni eru leyfð á Íslandi og eru einkum notuð í sumar tegundir gos- og svaladrykkja og sælgætis.
Ákveðið í lok september hvort aðgerða sé þörf
Matvælaöryggisstofnun Evrópu (EFSA) hefur fengið niðurstöður rannsóknarinnar til umsagnar og mun á fundi í lok september fara yfir þær. Stofnunin hefur unnið að því að undanförnu að fara yfir öryggi allra litarefna sem leyfð eru í Evrópu. Matvælasvið Umhverfisstofnunar fer með málefni aukefna hér á landi og samkvæmt upplýsingum frá stofnuninni þá mun hún fylgjast náið með vinnu og úrskurði Matvælaöryggisstofnunar Evrópu.
Niðurstaða fundar EFSA 28. september.
Á fundi Matvælaöryggisstofnunar Evrópu 28. september var ákveðið að biðja um fleiri gögn frá University of Southampton varðandi rannsóknina til að geta betur lagt mat á hana. Að auki mun Matvælaöryggisstofnunin flýta vinnu sinni við að fara yfir öryggi allra litarefna sem leyfð eru í Evrópu og kappkosta við að ljúka þeirri vinnu í janúar 2008.
Börn drekki minna af gos- og svaladrykkjum og borði minna sælgæti
Efnin sem liggja undir grun, um að geta haft neikvæð áhrif á hegðun barna, fá börn aðallega úr gos- og svaladrykkjum og sælgæti. Niðurstöður rannsóknarinnar virðast því gefa enn frekari ástæðu til þess að takmarka neyslu barna á þessum vörum. Ef börn drekka gos- og svaladrykki og borða sælgæti einungis við sérstök tilefni þá munu þau um leið takmarka neyslu á fyrrgreindum aukefnum.
Ítarefni um rannsóknina:
Heimasíða Lancet: www.thelancet.com
Heimasíða Umhverfisstofnunar: www.ust.is
Heimasíða Matvælaöryggisstofnunar Evrópu: www.efsa.europa.eu
Heimasíða Food Standards Agency í Bretlandi: www.food.gov.uk