Frá fundi um samstarf um meira framboð af hollum mat
Miðvikudaginn 28. mars buðu heilbrigðis- og tryggingamálaráðuneytið, Lýðheilsustöð og Samtök iðnaðarins til morgunverðarfundar á hótel Nordica þar sem til umfjöllunar var samstarf um aukið framboð á hollum matvörum, markaðssetning, vöruþróun og skammtastærðir.
Heilbrigðis- og tryggingamálaráðherra, Siv Friðleifsdóttir setti fundinn og lýsti yfir ánægju sinni með góða mætingu á fundinn en hátt í 140 manns voru í salnum. Ráðherra kvaðst telja að á næstu árum yrði viðhorfsbreyting til mataræðis hjá íslensku þjóðinni. Hún sagðist vonast til að svokölluð nammihorn í stórmörkuðum yrðu sýnd á Þjóðminjasafninu eftir nokkur ár, sem dæmi um liðna tíð í neysluvenjum þjóðarinnar.
Anna Elísabet Ólafsdóttir forstjóri Lýðheilsustöðvar flutti erindi um skammtastærðir matvæla og tók dæmi um það hvernig matarksammtar og einingar hafa verið að stækka á undanförnum árum. Anna talaði einnig um að neysla harðrar fitu hefur minnkað hér á landi á undanförnum árum en lagði þó áherslu á að hún væri enn allt of mikil.
Ragnheiður Héðinsdóttir, matvæðafræðingur hjá Samtökum iðnaðarins flutti erindi sem fjallaði m.a. um vöruþróun með tilliti til næringar hjá matvælaframleiðendum og stefnu matvælaiðnaðarins á sviði næringar.
Sjá glærur með erindi Ragnheiðar
Iðunn Geirsdóttir, gæðastjóri Myllunnar var með erindi um heilsustefnu og aðgerðir Myllunnar á sviði næringar og vöruþróunar.
Markaðssetning óhollrar matvöru var umfjöllunarefni Friðriks Larsen, markaðsfræðings og lektors við Háskólann í Reykjavík.
Sjá glærur með erindi Friðriks
Stefán Jóhannsson, gæðastjóri Subway á Íslandi flutti að lokum erindi um hvernig skyndibitastaðir geta bætt framboð á hollum mat. Að fyrirlestrunum loknum fóru fram pallborðsumræður þar sem Ragnheiður Haraldsdóttir skrifstofustjóri í heilbrigðis- og tryggingamálaráðuneytinu, Anna E. Ólafsdóttir forstjóri Lýðheilsustöðvar, Jón Steindór Valdimarsson, aðstoðarframkvæmdastjóri hjá Samtökum iðnaðarins, Guðrún E. Gunnarsdóttir formaður Matvæla- og næringarfræðingafélags Íslands og Friðrik Larsen lektor við Háskólann í Reykjavík, sátu fyrir svörum.
Fundarstjóri var Sigmar Guðmundsson, sjónvarpsmaður.