Fæðuframboð á Íslandi árið 2000
Gosdrykkir aukast ár frá ári en grænmetið stendur í stað.
Ef litið er á þróun mataræðis undanfarin ár kemur í ljós að nýmjólk og vörur unnar úr nýmjólk minnka ár frá ári, en léttmjólk og fituminni mjólk eykst. Samt sem áður er mjólkurneyslan enn mikil borið saman við önnur lönd og þá sérstaklega neysla nýmjólkur en þar eigum við greinilegt Norðurlandamet. Grænmetið stendur hins vegar nokkurn veginn í stað milli ára og hefur lítið haggast frá árinu 1998. Þótt neysla grænmetis hafi nærri tvöfaldast frá 1975, er hún minni en á öðrum Norðurlöndum og mun minni en æskilegt getur talist út frá hollustusjónarmiðum. Ávextir minnka lítillega á árinu. Það hefur því lítið orðið ágengt í að auka grænmetis- og ávaxtaneyslu Íslendinga síðustu árin.
Sykurneyslan er enn mjög mikil á Íslandi borið saman við önnur lönd. Hún hefur nánast verið óbreytt undanfarna fjóra áratugi eða sem samsvarar 1 kg á íbúa á viku. Gosdrykkir eiga drjúgan þátt í sykurneyslunni. Þeir aukast sífellt og voru árið 1999 komnir í 160 lítra á hvern íbúa á ári eða tæplega hálfan lítra á dag. Sælgæti eykst einnig og því virðist sykur til heimilisnota hafa minnkað á móti. Gosdrykkir og sælgæti eiga vafalítið sinn þátt í aukinni offitu sem einkennir íslenskt þjóðfélag um þessar mundir.
Kjötneyslan eykst lítillega síðastliðið ár og er þar aðallega um aukningu á kjúklinga- og lambakjöti að ræða. Svínakjöt stendur í stað milli áranna 1999 og 2000 en mikil aukning var í neyslu þess árið 1999. Þótt smjör, smjörlíki, Smjörvi og Létt og laggott hafi lítið breyst síðastliðið ár hefur smjörlíkisnotkun minnkað mikið síðastliðinn áratug. Neysla á olíum og öðru feitmeti eykst hins vegar. Þegar litið er á fitu sem kemur úr mjólk, kjöti, smjöri og smjörlíki, sem í daglegu tali er kölluð hörð fita, kemur í ljós að hún fer heldur minnkandi á árinu. Á síðastliðnum tveimur áratugum hefur hún hins vegar minnkað mjög mikið eða um 27% og vegur minni smjörlíkisneysla þyngst í þeirri þróun. Hörð fita hækkar kólesteról í blóðinu og því er þetta ein af jákvæðustu breytingunum sem átt hefur sér stað á mataræði landsmanna á undanförnum árum.
Manneldisráð vekur einnig athygli á nýrri skýrslu á vegum Norrænu ráðherranefndarinnar um fæðuframboð á Norðurlöndunum fyrir árin 1965-1998. Einnig hafa fæðuframboðstölur fyrir Norðurlöndin, frá árinu 1990, verið birt í Árbók norrænnar töfræði (Yearbook of Nordic Statistics) sem fánleg er á Hagstofu Íslands.