Akrylamíð í matvælum
Ráðleggingar um neyslu matvæla
Akrylamíð fyrirfinnst ekki í hráefnum eða matvælum frá náttúrunnar hendi heldur myndast það við mikla hitun sterkjuríkra matvæla, einkum steikingu. Ekkert akrylamíð virðist þó myndast við suðu og því eru soðnar kartöflur, hrísgrjón og pasta laus við efnið en mest magn fannst í kartöfluflögum og steiktum, frönskum kartöflum.
Þessar nýju niðurstöður eru mikil ögrun og áskorun fyrir matvælaiðnaðinn um að breyta vinnsluaðferðum til að koma í veg fyrir myndun akrylamíðs. Ekki er þó ástæða til að breyta ráðleggingum um hollt mataræði í ljósi þessara niðurstaðna. Enn sem fyrr er lögð áhersla á að auka neyslu grænmetis, ávaxta, kornvara og fisks. Það sem er nýtt er hins vegar aukin áhersla á forðast kartöfluflögur, snakk, franskar kartöflur og kex. Eins er fólki ráðlagt að steikja ekki mat of mikið eða við háan hita. Að öðru leyti eru niðurstöður ekki nógu skýrar til að hægt sé að koma með frekari ábendingar um breytt fæðuval.