Mikilvægara að fá nóg D-vítamín en ríflegt magn af kalki
Rannsóknin beindist að því að meta kalkbúskap 1600 Íslendinga á aldrinum 35-85 ára með því að mæla kalkhormón í blóði, ásamt D-vítamíni og kalki. Kalkhormónið hækkar alla jafna í blóði þegar kalsíum til líkamans er af skornum skammti. Rannsóknin sýndi að ef D-vítamínið er ófullnægjandi þá geta jafnvel stórir kalkskammtar ekki yfirunnið það og merki um ófullnægjandi kalkbúskap gera vart við sig. Hins vegar nægir hóflegri kalkneysla, þ.e. 800 mg á dag, svo framarlega sem D-vítamínið helst hátt. D-vítamín í blóði Íslendinga lækkar alla jafna mjög um vetrartímann, einkum meðal þeirra sem ekki taka lýsi eða D-vítamínpillur.
„Það er tvímælalaust ástæða til að hvetja fólk á Íslandi og öðrum norðlægum slóðum, til að taka D-vítamín aukalega, annað hvort lýsi, belgi eða pillur, til að styrkja beinin og koma í veg fyrir beinþynningu. D-vítamín er í fáum fæðutegundum og það er því undantekning frá þeirri almennu reglu, að hollt og fjölbreytt fæði nægi til að tryggja góða næringu”, segir Laufey Steingrímsdóttir, einn höfunda greinarinnar.
Umfjöllun í Peer View Media Bar