Geðrækt
Heilsuvika og Geðveikir dagar
Það fer í vöxt að sveitarfélög standi fyrir heilsuátaki í ákveðinn tíma og hvetji þá íbúa til að taka þátt í heilsueflandi atburðum. Oftar en ekki er leitað til Lýðheilsustöðvar með fræðsluefni og fagnar stöðin slíkum tækifærum til að koma að eflingu heilsu í sveitarfélögum. Nú stendur yfir heilsu- og forvarnavika í Reykjanesbæ og meðal atburða eru Geðveikir dagar þar sem geðorðin 10 eru í hávegum höfð.
Geðorðin 10 eru núorðið landsþekkt en á sínum tíma voru ísskápaseglar með orðunum send til allra heimila í landinu. Síðan hafa geðorðin verið nýtt í heilsueflingarstarfi á ýmsan máta og komið út með ýmsu sniði, m.a. þýdd á algengustu tungumál sem töluð eru í landinu.
Í Reykjanesbæ er það Björgin, Geðræktarmiðstöð Suðurnesja, sem stendur fyrir Geðveikum dögum 22. - 25. september. Liður þar í er að gera geðorðin sýnileg víða um sveitarfélagið. Á Geðveikum dögum á síðasta ári voru geðorðin notuð í geðræktargöngu og plöstuð geðorð voru bundin á ljósastaura bæjarins. Í ár eru stök geðorð máluð á veggi víðsvegar um bæinn og í vinnslu er að þau verði sett á strætó.
Meira um heilsu- og forvarnaviku Reykjanesbæjar
 |
 |
|---|