Bæjar- og útihátíðir - ábyrgð skipuleggjenda og foreldra
Með hverju árinu fjölgar þeim stöðum á landinu þar sem á sumrin er boðið upp á bæjar- og/eða útihátíð, landsmönnum yfirleitt til ánægju og yndisauka. Lýðheilsustöð vill þó vekja athygli foreldra og skipuleggjenda þessara hátíða á þeirri ábyrgð sem á þeim hvílir hvað varðar þátttöku barna og ungmenna í hátíðahöldunum.Fleiri tækifæri til að neyta áfengis
Fleiri bæjar- og útihátíðir fjölga nefnilega þeim tækifærum sem ungt fólk hefur því miður oft nýtt sér til að neyta áfengis og jafnvel annarra vímuefna. En hátíðir, sem þessar, ættu að standa undir því nafni og vera hátíð og skemmtun - ekki allsherjar drykkjupartí, með tilheyrandi ólátum, ofbeldi, ölvunarakstri, kynferðisofbeldi og slysum. Til að svo megi vera þarf að vera gott aðhald og eftirlit með því að hátíðin fari vel fram.
Ábyrgð á áfengisneyslunni
Foreldrar, bæjaryfirvöld og skipuleggjendur þurfa að sameinast um að gera hátíðirnar eftirminnilegar vegna skemmtunarinnar og ánægjustundanna en ekki fyrir unglingadrykkjuna og leiðinlegum eftirmálum hennar. Það eru í gildi lög varðandi neyslu áfengis og það þarf að framfylgja þeim – útihátíðir eru þar engin undantekning. Þeir sem standa að hátíðarhöldunum verða að bera ábyrgð á því að hún fari vel fram og að reglum sé framfylgt. Fullorðnir mega svo ekki gleyma því að þeir eru fyrirmynd þeirra yngri.
Skemmtun með aðhaldi
Auðvelt er fyrir fjölskylduna að njóta þess að skemmta sér saman á hátíðunum, jafnvel þó unglingnum sé gefinn laus taumur – það má bara ekki sleppa honum. Séu foreldrar aftur á móti að íhuga að leyfa unglingnum sínum að fara einum á útihátíð, útilegu eða í sumarbústað með vinunum ættu þeir að hafa eftirfarandi að leiðarljósi:
- Að foreldrar bera ábyrgð á börnum sínum til 18 ára aldurs.
- Að óheimilt er að selja, veita eða afhenda þeim áfengi sem eru yngri en 20 ára.
- Að ábyrgur fullorðinn sé með í för – ræða við hann um ferðina, hvað sé leyft og hvað ekki.
- Að um skipulagða hátíð sé að ræða og því eftirlit og gæsla á staðnum.
- Að þótt foreldri treysti sínum unglingi þá geta aðstæður orðið þannig að hann ræður ekki við þær og bregst þá ekki rétt við.
- Að brýna þarf fyrir unglingnum að þiggja aldrei far með bíl þar sem grunur leikur á um að ökumaðurinn sé undir áhrifum áfengis.
- Að brýna fyrir unglingnum að þiggja ekki drykki hjá öðrum, því möguleiki er á að ólyfjan hafi verið blandað út í drykkinn.
Lokaspurning, til að spyrja sig, gæti verið sú hvort það sé áhættunnar virði að leyfa unglingum að fara?
Höfum alla vega hugfast að það er hlutverk okkar fullorðnu að vernda börnin okkar eftir megni fyrir hættum. Það gerum við m.a. með því að sýna börnunum okkar aðhald og umhyggju – sem þýðir m.a. að segja „nei“, þegar það á við.
(Ljósmyndir: Ragnar Th.)
Meira tengt þessum málum:
Ungt fólk og skaðleg áhrif áfengis