Smábarn verður fyrir eitrun vegna plöntu
Læknir barnsins hafði samband við Árvekni til að fá upplýsingar um hvaða reglur væru í gildi um merkingar á eitruðum plöntum. Árvekni hefur sett inn á heimasíðu sína lista yfir eitraðar plöntur og er hann í stöðugri endurvinnslu. Af gefnu tilefni viljum við benda foreldrum, ömmum, öfum og öðrum sem sinna börnum á að fara yfir þær plöntur sem eru á heimilinu og í garðinum til að kanna hvort einhverjar þeirra geti verið eitraðar. Mikilvægt er að fjarlægja eitraðar pöntur og setja þær þar sem lítil börn ná ekki til. Ef eitraðar plöntur eru í garðinum er mikilvægt að gæta barnanna sérstaklega vel og hugsanlega fjarlægja plönturnar. Framkvæmdastjóri Árvekni kannaði hvort einhverjar reglur væru í glildi hér á landi varðandi merkingar á eitruðum plöntum. Í ljós kom eftir að hafa talað við nokkrar stofnanir að það er alls ekki ljóst hver á að hafa eftirlit með innflutningi slíkra plantna. Árvekni telur að gera þurfi innflytjendur, framleiðendur og seljendur ábyrga fyrir að merkja allar plöntur sem eru eitraðar þannig að fólk átti sig á því og velji frekar aðrar plöntur sem ekki geta skaðað börnin á heimilinu. Árvekni mun fylgja þessu máli eftir og sjá til þess að tekið verði á þessu og mun jafnframt í framtíðinni gefa út frekari upplýsingar um eitraðar plöntur sem dreift verður á heilsugæslustöðar landsins og fleiri staði.