14 ára drengur brennist í setlaug
Slysið varð með þeim hætti að bilun var í blöndunartækjum í setlaug og var þá gripið til þess ráðs að leiða slöngur með heitu og köldu vatni í hana til þess að fylla hana. Drengurinn fór út í laugina á meðan vatnið var að renna í hana og ekki vildi betur til en svo að slangan með heita vatninu færðist til með þeim afleiðingum að sjóðandi heitt vatn skvettist á annað læri hans. Hann hlaut 2° brunasár.
Að gefnu tilefni vill Árvekni benda öllum þeim sem eru með setlaugar að huga vel að öllum öryggisatriðum. Eftirfarandi atriði ber að hafa í huga:
1. Öryggisvari þarf að vera á rennsli vatnsins. Hann er stilltur á æskilegt hitastig og mælir hitastig vatnsins á nokkrum stöðum í setlauginni. Minnki rennsli á kalda vatninu að einhverjum orsökum nema mælar það og heita vatnið hættir að renna. Þannig er tryggt að æskilegt hitastig haldist á vatninu.
2. Lok þarf að vera á setlaugum þegar þær eru ekki í notkun. Nokkur börn hafa verið hætt komin eftir að hafa dottið í setlaugar sem voru loklausar og fullar af vatni. Laufblöð geta lokað niðurfallinu og þannig skapast hætta á að regnvatn safnist fyrir.
3. Girðing þarf að vera í kringum garða þar sem setlaugar eru og á þeim þurfa að vera sjálflokandi hlið.
4. Mikilvægt er að fella ekki setlaugina í sólpallinn heldur að hafa a.m.k 50-60 cm brún upp í setlaugina vegna smábarna.
5. Huga þarf að því að niðurföll í setlauginni séu öryggisniðurföll þannig að hár barna festist ekki ef börn eru að kafa og hafa fjarlægt tappann.
Að lokum viljum við benda foreldrum á að skilja börn aldrei eftir eftirlitslaus í setlaugum, ekki eitt augnablik en slík vangá getur reynst dýrkeypt.
Hér á heimasíðunni má finna ítarlega umfjöllun um setlaugar og drukknun.
Herdís L. Storgaard, framkvæmdastjóri Árvekni