Fimm mánaða barn hætt komið í baðkari
Skilgreining á nærdrukknun er: Barnið fer í öndunarstopp eða öndunar- og hjartastopp og þarfnast endurlífgunar. Slíkt ástand getur verið lífshættulegt. Sé barninu ekki komið til hjálpar mjög fljótt er hætta á súrefnisskorti sem orsakað getur varanlegan heilaskaða.
Slysið átti sér stað þegar verið var að baða barnið. Barnið var í baðsæti í baðkarinu en litið var af því augnablik. Baðsætið, sem fest er við baðkarið með sogkoppum, losnaði með þeim afleiðingum að barninu hvolfdi. Barninu var strax komið til hjálpar og flutt á sjúkrahús og því virðist ekki hafa orðið meint af.
Að gefnu tilefni er eftirfarandi komið á framfæri:
* Smábörn geta drukknað í vatni sem er 2-5 sm djúpt. Það getur gerst hljóðlega og á innan við 3 mínútum.
* Baðsæti eru ætluð börnum 6 mánaða og eldri. Í leiðbeiningum er þess getið hversu lengi barnið má nota búnaðinn (hámarksaldur).
* Baðsæti eru ekki öryggisbúnaður heldur eru þau til að létta þeim vinnuna sem er að baða barnið.
* Barn í baðsæti þarf ekki að hreyfa sig mikið til að sogkopparnir, sem halda sætinu föstu við baðkarið, geti losnað - með fyrrnefndum afleiðinum.
* Aldrei má skilja barn eftir eitt í baðsæti – ekki svo mikið sem eitt augnablik
Mörg slys í baðsætum í öðrum löndum
Talsvert er um að börn hafi drukknað í baðsætum í öðrum löndum en þetta er fyrsta alvarlega slysið hér á landi. Foreldrar og forráðamenn barna eru beðnir að hafa þetta í huga og að fara að öllu með gát þegar að þessi búnaður en notaður.
Á árinu 2005 hafa 6 börn, tveggja ára og yngri, verið næstum drukknað hér á landi og er þetta skelfileg þróun.
Nánari upplýsingar veitir
Herdís L. Storgaard
gsm 8400906, sími 5800906
verkefnastjóri barnaslysavarna
Árvekni - Lýðheilsustöð