Árvekni-slysavarnir barna
Slasaðist þegar hann féll af trampólíni
Lögregla og sjúkraflutningamenn voru kallaðir að íbúðarhúsi í Keflavík í gærkvöldi en í bakgarði hússins hafði 12 ára drengur slasast við leik á trampólíni. Leiktækið var búið öryggisneti en pilturinn féll út um gat sem var á því og kom harkalega niður á steypta stéttina. Pilturinn hljóp því næst inn á heimilið en missti þar meðvitund.
Að sögn lögreglunnar í Keflavík var pilturinn fluttur með sjúkrabíl á Landspítala Háskólasjúkrahús. Lögreglu bárust upplýsingar um að pilturinn hefði komist til meðvitundar en yrði hafður undir eftirliti á Landspítalanum fram á næsta dag.
Lögreglan vill vegna þessa árétta við foreldra og forráðamenn barna og ungmenna að huga að öryggisþáttum þessara leiktækja. Eins sé það ávísun á óhöpp eða slys ef margir eru að hoppa á þeim í einu en í leiðbeiningum, sem fylgi flestum þessara leiktækja, komi fram að einungis einn skuli vera við leik í einu.
Frétt af www.mbl.is - 21.7.2005