Lýðheilsustöð - Lýðheilsustöð

Lýðheilsustöð fer undir embætti landlæknis

Fri, 29 Apr 2011 15:12:00 +0000

Embætti landlæknis tekur frá 1. maí 2011 við eignum Lýðheilsustöðvar sem og réttindum og skyldum hennar að því er varðar framkvæmd þeirra laga sem falla undir málefnasvið hennar á þeim tíma.

Starfsemi stöðvarinnar og flestir starfsmenn flytja til embættis landlæknis frá sama tíma. Fréttaflutningur frá starfseminni verður á vef embættis landlæknis en allt efni Lýðheilsustöðvar verður aðgengilegt á vef stöðvarinnar þar til nýr vefur verður opnaður með efni beggja stofnanna.

Flensborg fær Gulleplið

Fri, 29 Apr 2011 09:16:00 +0000

Flensborgarskóli í Hafnarfirði hlaut Gulleplið – viðurkenningu fyrir framúrskarandi starf á sviði heilsueflandi framhaldsskóla. Það var mennta- og menningarmálaráðherra, Katrín Jakobsdóttir sem afhenti eplið þann 27. apríl. Flensborgarskóli var fyrsti skólinn sem hóf formlega að starfa með Lýðheilsustöð að heilsueflandi framhaldsskóla en nú hafa 24 framhaldsskólar fylgt í kjölfarið. Gert er ráð fyrir að á hverju ári hljóti einhver skólanna Gulleplið sem viðurkenningu fyrir afburða gott starf í sínum skóla.

Lýðheilsustöð lögð niður

Wed, 6 Apr 2011 15:35:00 +0000

Við þriðju umræðu á Alþingi um frumvarp til laga um nýja sameinaða stofnun Lýðheilsustöðvar og Landlæknisembættisins var lögð fram óvænt breytingatillaga, sem snérist að forminu til um nafn á nýrri stofnun, en fól fleira í sér. Frumvarpið var samþykkt með breytingatillögunni þann 30. mars s.l. og með því verður Lýðheilsustöð lögð niður frá og með 1. maí 2011. Nýju lögin fela í sér breytingar á lögum um landlækni nr. 41/2007 og að lög nr. 18/2003 um Lýðheilsustöð verða felld úr gildi. Starfsfólki Lýðheilsustöðvar verða boðin störf við embætti landlæknis.

Hliðarfletir vilja verða útundan

Wed, 23 Mar 2011 14:38:00 +0000

Tæplega 1,8 milljón íslenskra hliðartannflata fær enga hreinsun, skv. niðurstöðum úr rannsókninni Heilsa og líðan Íslendinga 2007. Af þeim 8.562.694 íslensku hliðartannflötum sem hægt er að hreinsa með tannþræði fá einungis 1.578.354 daglega hreinsun. Ætla má að með aukinni notkun á tannþræði geti fullorðnir Íslendingar fækkað tannskemmdum stórlega og sparað þannig umtalsverðar fjárhæðir í viðgerðarkostnað.

Heilsuáætlun Evrópusambandsins - opnað fyrir styrkumsóknir

Mon, 7 Mar 2011 13:40:00 +0000

Opnað hefur verið fyrir nýjar styrkumsóknir vegna heilsuáætlunar Evrópusambandsins og er opið fyrir umsóknir til 27. maí n.k. Önnur heilsuáætlun ESB tók gildi 1. janúar 2008 og gildir í sex ár, eða til ársins 2013. Fjármagn sem er til ráðstöfunar vegna áætlunarinnar er 321,5 milljónir Evra á tímabilinu en því er ætlað að fjármagna samstarfsverkefni og aðgerðir sem stuðla að samstöðu og hagsæld innan ESB-landa.

Heilsa og líðan Íslendinga 2007

Thu, 3 Mar 2011 13:00:00 +0000

Á vef Lýðheilsustöðvar er komin út skýrslan Heilsa og líðan Íslendinga 2007: Framkvæmdaskýrsla. Rannsóknin ,,Heilsa og líðan Íslendinga" byggir á póstkönnun sem var send til tæplega 10.000 Íslendinga á aldrinum 18–79 ára í lok október 2007. Skýrslan er öllum opin á vefsvæði rannsóknarinnar. Þess má geta að fjallað verður um rannsóknina, sem og framhaldsrannsókn árið 2009, í þættinum Vísindi og nýsköpun í Sjónvarpinu 7. mars n.k.

Verðlaun fyrir besta barnaefnið á netinu

Thu, 17 Feb 2011 11:56:00 +0000

Verðlaun voru veitt í Evrópusamkeppni um besta barnaefnið á netinu á alþjóðlega netöryggisdeginum, 8. febrúar síðastliðinn, og hlaut myndin ,,Hugsaðu áður en þú sendir" verðlaun í flokki ungs fólks og vefur Námsgagnastofnunar í flokki fullorðinna.

Alþjóðlegi netöryggisdagurinn 2011

Mon, 31 Jan 2011 12:46:00 +0000

Alþjóðlegi netöruyggisdagurinn er 8. febrúar og af því tilefni verður haldin ráðstefna um öryggi á netinu. Erlendir og innlendir sérfræðingar flytja erindi og að þessu sinni er lögð áhersla á stefnumótun, þróun og tækifæri á vettvangi veraldarvefsins.

Lýðheilsustöð er virkur þátttakandi í SAFT verkefninu, sem Heimili og skóli stýrir, en það er hluti af Safer Internet Action Plan, aðgerðaáætlun Evrópusambandsins um öruggari netnotkun og er styrkt af ESB.

10. Norræna lýðheilsuráðstefnan - haldin í Finnlandi 24.-26. ágúst

Mon, 24 Jan 2011 09:48:00 +0000

Næsta norræna lýðheilsuráðstefna verður haldin í Turku í Finnlandi í ágústmánuði. Aðalþema ráðstefnunnar að þessu sinni er „Health promotion at a system level - How does the Nordic welfare model cope with today's challenges?“
Óskað er eftir að þeir sem ætla að senda inn „abstract“ geri það fyrir 1. mars n.k.

Sameiningin frestast

Thu, 30 Dec 2010 01:55:00 +0000

Á árinu 2010 hefur starfsfólk Landlæknisembættisins og Lýðheilsustöðvar búið sig undir sameiningu stofnananna tveggja sem gert var ráð fyrir að tæki gildi nú við áramót þann 1. janúar 2011.

Áhrif kreppunnar á heilsu og líðan landsmanna

Mon, 6 Dec 2010 14:08:00 +0000

Lýðheilsustöð, ásamt samstarfsaðilum, hefur staðið fyrir rannsókninni Heilsa og líðan Íslendinga, sem fyrst var gerð árið 2007 og síðan framhaldsrannsókn að hausti 2009. Töluvert er verið að vinna úr rannsóknagögnunum, bæði á vegum stöðvarinnar og annarra sem til þess hafa fengið leyfi, og á fræðadögum heilsugæslunnar sem fram fóru 19. nóvember sl., var flutt erindi um áhrif kreppunnar á heilsu og líðan Íslendinga.

Egilsstaðaskóli er formlegur heilsueflandi grunnskóli

Thu, 2 Dec 2010 14:24:00 +0000

Lýðheilsustöð vinnur að því með grunnskólum landsins að þeir starfi í anda „heilsueflandi grunnskóla“, sem m.a. byggir á verkefninu Schools for Health in Europe. Nú er Egilsstaðaskóli orðinn fyrsti formlegi heilsueflandi grunnskóli landsins og var því fagnað á sérstakri heilsuhátíð í skólanum fyrir skömmu.

Lagafrumvarp vegna nýrrar stofnunar lagt fram á Alþingi

Wed, 17 Nov 2010 09:03:00 +0000

Á þingfundi 16. nóvember var lagt fram til 1. umræðu lagafrumvarp heilbrigðismálaráðherra vegna sameiningar Lýðheilsustöðvar og Landlæknisembættisins. Áætlað er að stofnanirnar verði sameinaðar 1. janúar 2011 og við sameiningunni verður til ný stofnun; embætti landlæknis og lýðheilsu.

Nýr samningur um heilsueflingu í framhaldsskólum

Mon, 4 Oct 2010 09:50:00 +0000

Undirritaður hefur verið nýr samningur um heilsueflingu í framhaldsskólum milli Lýðheilsustöðvar, heilbrigðisráðuneytisins, menntamálaráðuneytisins, samtaka framhaldsskólanemenda, Félags íslenskra framhaldsskóla og Ráðgjafanefndar um æskulýðsrannsóknir. Undirritunin fór fram í Flensborgarskóla í Hafnarfirði 1.10.10 en á sama tíma fóru fram mikil hátíðarhöld í skólanum, m.a. vegna þess að skólinn telst nú forystuskóli heilsueflandi framhaldsskóla.

Flensborg Heilsueflandi framhaldsskóli

Thu, 30 Sep 2010 12:42:00 +0000

Eitt af verkefnum Lýðheilsustöðvar er að vinna með framhaldsskólum landsins að velferð og góðri heilsu framhaldsskólanema undir heitinu Heilsueflandi framhaldsskólar. Á morgun verða hátíðarhöld í Flensborgarskólanum í Hafnarfirði í tilefni afþví að skólinn er fyrsti formlegi heilsueflandi framhaldsskóli landsins.

Kyrrðarstund og kertafleyting til minningar um þá sem fallið hafa frá fyrir eigin hendi

Fri, 10 Sep 2010 15:28:00 +0000

Í tilefni alþjóðlegs dags sjálfsvígsforvarna verður haldin kyrrðarstund í Dómkirkjunni föstudaginn 10. september 2010, kl. 20:00 – 20:30, á vegum þjóðkirkjunnar, Landlæknisembættisins, geðsviðs Landspítala, Geðhjálpar og Hugarafls.

Heilsuskilaboð Lýðheilsustöðvar á mjólkurfernum

Tue, 7 Sep 2010 12:44:00 +0000

Lýðheilsustöð og Mjólkursamsalan hafa tekið höndum saman um að koma á framfæri ábendingum um heilsuna. Þetta er gert með því að birta heilsuskilaboð frá Lýðheilsustöð á mjólkurfernum og daglega munu því skilaboð Lýðheilsustöðvar rata inn á nánast hvert heimili landsins.

Heilsuverndarstöðin hýsir nýju stofnunina

Thu, 2 Sep 2010 12:44:00 +0000

Ákveðið hefur verið að ganga til samninga við eigendur Heilsuverndarstöðvarinnar, Barónsstíg 47, um leigu á hluta af húsnæðinu fyrir nýja stofnun, sem verður til við sameiningu Lýðheilsustöðvar og Landlæknisembættisins.

Vel heppnaðir starfsdagar

Thu, 19 Aug 2010 23:17:00 +0000

Að baki eru nú tveir afar vel heppnaðir starfsdagar sem Lýðheilsustöð gekkst fyrir um Heilsueflandi grunnskóla. Þátttakendur voru á þriðja hundrað frá meira en 30 skólum. Það var Víkurskóli í Grafarvogi sem hýsti starfsdaga Lýðheilsustöðvar af myndarskap og mikilli hjálpsemi.

Starfsdagar fyrir heilsueflandi grunnskóla - Dagskrá

Wed, 11 Aug 2010 11:29:00 +0000

Lýðheilsustöð gengst fyrir starfsdögum fyrir kennara og starfsfólk grunnskóla um heilsueflandi grunnskóla, dagana 17. og 18 ágúst n.k. í Víkurskóla í Grafarvogi.

Götuhátíð Jafningjafræðslunnar

Wed, 14 Jul 2010 12:04:00 +0000

Jafningjafræðslan og stuðningsaðilar bjóða landsmönnum að fagna með sér sumrinu á götuhátíð á Austurvelli föstudaginn 16. júlí frá kl. 14:00. Þar mun fjöldi tónlistarmanna og listamanna stíga á stokk.

SAMAN í sólinni í sumar

Fri, 2 Jul 2010 14:17:00 +0000

Foreldrar eru hvattir til að njóta sumarsins með börnunum sínum og unglingum og verja tímanum saman. Sumarið einkennist oft af útilegum, útihátíðum og sumarbústaðaferðum, en mikilvægt er að foreldrar hafi í huga að börn og unglingar undir 18 ára aldri eiga ekki erindi í slíkar ferðir eftirlitslaus. Söfnum góðum minningum í sumar - SAMAN í sólinni.

Könnun á notkun vefsíðu Lýðheilsustöðvar

Tue, 29 Jun 2010 10:25:00 +0000

Notendur vefsíðu Lýðheilsustöðvar gætu orðið varir við það á næstu vikum að gluggi birtist á síðunni þar sem þeir eru beðnir að svara nokkrum spurningum um vefsíðuna. Með þessari könnun er verið að búa í haginn til að gera vefsíðuna enn betri og bæta við efni sem notendum finnst vanta. Það væri Lýðheilsustöð mikils virði að sem flestir tækju þátt því þannig getum við sameiginlega mótað góðan og notadrjúgan vef til framtíðar.

Ánægja með lög um að börnum sé bannað að fara í ljósbekki

Wed, 16 Jun 2010 13:01:00 +0000

Lýðheilsustöð lýsir yfir ánægju sinni með að lög um bann við ljósabekkjanotkun barna hafi náð fram að ganga. Stöðin hefur í samstarfi við fleiri unnið að því á undanförnum árum að vara við skaðlegum áhrifum sólargeisla á húðina, ekki síst barna.

Forsetafrúr í heimsókn

Thu, 10 Jun 2010 16:12:00 +0000

Hluti af opinberri heimsókn forseta Eistlands til Íslands er sérstök dagskrá fyrir forsetafrúnna. Hún hafði óskað eftir að fá kynna sér lýðheilsustarf, ekki síst það sem snýr að því að draga úr ofþyngd sem og vímuvörnum. Rétt fyrir hádegi í dag komu því í heimsókn til Lýðheilsustöðvar forsetafrú Íslands, Dorrit Moussaieff og Evelin Ilves, forsetafrú Eistlands, ásamt fríðu föruneyti.

Hættu að hanga! Komdu að hjóla, synda eða ganga!

Wed, 26 May 2010 15:54:00 +0000

Allir þurfa að hreyfa sig daglega, eftir bestu getu, og sumir þurfa meiri hvatningu til þess en aðrir. UMFÍ er að hleypa af stokkunum skemmtilegu og hvetjandi hreyfingarverkefni sem þeir nefna ,,Hættu að hanga - komdu að hjóla, synda og ganga". Lýðheilsustöð styður verkefnið en það hefst formlega með fjölskyldudegi 5. júní á Miðfelli í Hrunamannahreppi.

Eldgosið í Eyjafjallajökli – hvað ber að hafa í huga

Fri, 16 Apr 2010 16:29:00 +0000

Lýðheilsustöð beinir því til landsmanna að fylgjast vel með ábendingum opinberra aðila um hvað beri að gera í aðstæðum eins og þeim sem skapast hafa vegna eldgossins í Eyjafjallajökli.

Er hlutfall barna yfir kjörþyngd hætt að aukast?

Fri, 16 Apr 2010 14:34:00 +0000

Undanfarin misseri hefur víða verið rætt um líkamsþyngd grunnskólabarna. Í slíkri umræðu er mikilvægt að tekið sé mið af bestu fáanlegu upplýsingum á hverjum tíma en nokkuð hefur borið á ónákvæmni í meðferð bæði talna og hugtaka. Lýðheilsustöð og Heilsugæsla höfuðborgarsvæðisins hafa tekið saman upplýsingar og gefið út í skýrslunni ,,Líkamsþyngd barna á höfuðborgargsvæðinu - Er hlutfall barna yfir kjörþyngd hætt að aukast?" þar sem komið er á framfæri nýjum tölum og stuttri útlistun á lykilhugtökum sem notuð eru um líkamsþyngd barna.

Skólaþing Lýðheilsustöðvar - eflt samstarf heilbrigðis- og skólastofnana

Mon, 12 Apr 2010 16:32:00 +0000

Skólaþing Lýðheilsustöðvar, 9. apríl, var mjög vel sótt og almenn ánægja með það efni sem þar kom fram. Fyrirlestrar, ásamt hljóðskrám, hafa nú verið settir á vefsíðuna.

Skólaþing Lýðheilsustöðvar 9. apríl

Wed, 31 Mar 2010 15:03:00 +0000

Lýðheilsustöð, í samvinnu við heilbrigðisráðuneytið og mennta- og menningarmálaráðuneytið stendur fyrir öðru skólaþingi sínu þann 9. apríl n.k. Þingið er haldið í Rúgbrauðsgerðínni og er öllum opið og þátttakendum að kostnaðarlausu.