Komin er upp íslensk vefsíða með uppskriftum fyrir óáfenga drykki, „oafengt.is“. Þar er talsvert safn uppskrifta þó enn séu þar helst hátíðardrykkir en aðrir flokkar munu fljótt bætast við.

Vel er hægt er að njóta hátíðarinnar og allra jólakræsinganna án þess að það þurfi að hafa slæm áhrif á heilsuna.  Í léttum jólapistli er bent á auðveldar leiðir til þessa - og hvatt til hreyfingar og slökunar inn á milli. 

Lífsleikninámsefnið Vinir Zippýs eða „Zippy´s friends“ er alþjóðlegt forvarnarverkefni á sviði geðheilsu fyrir ung börn.
Á nýliðnu hausti hafa verið haldin 8 kennaranámskeið fyrir námsefnið á höfuðborgarsvæðinu. Þrjú þessara námskeiða tengdust landsbyggðinni í gegnum fjarfundabúnað og voru Akureyri, Ísafjörður og Grundarfjörður á hinum endanum.

Lýðheilsustöð, ásamt samstarfsaðilum, hefur staðið fyrir rannsókninni Heilsa og líðan Íslendinga, sem fyrst var gerð árið 2007 og síðan framhaldsrannsókn að hausti 2009. Töluvert er verið að vinna úr rannsóknagögnunum, bæði á vegum stöðvarinnar og annarra sem til þess hafa fengið leyfi, og á fræðadögum heilsugæslunnar sem fram fóru 19. nóvember sl., var flutt erindi um áhrif kreppunnar á heilsu og líðan Íslendinga.

Lýðheilsustöð vinnur að því með grunnskólum landsins að þeir starfi í anda „heilsueflandi grunnskóla“, sem m.a. byggir á verkefninu Schools for Health in Europe. Nú er Egilsstaðaskóli orðinn fyrsti formlegi heilsueflandi grunnskóli landsins og var því fagnað á sérstakri heilsuhátíð í skólanum fyrir skömmu.

Lýðheilsustöð tekur undir hvatningu Euro Safe um að stjórnvöld og stjórnendur skíðasvæða beiti sér fyrir því að allir sem nýta sér skíðasvæði hlíti skilyrðislaust þeirri reglu að vera með hjálm á höfði.
Á hverju ári slasast þúsundir manna við iðkun vetraríþrótta í Evrópu. Talið er að meðal þeirra sem iðka snjóbrekkuíþróttir í Evrópusambandinu verði á hverju 300.000 slys sem sinna þarf á spítölum, þar á meðal 170.000 skíðaslys og 90.000 snjóbrettaslys ⁽¹⁾.

Á þingfundi 16. nóvember var lagt fram til 1. umræðu lagafrumvarp heilbrigðismálaráðherra vegna sameiningar Lýðheilsustöðvar og Landlæknisembættisins. Áætlað er að stofnanirnar verði sameinaðar 1. janúar 2011 og við sameiningunni verður til ný stofnun; embætti landlæknis og lýðheilsu.

Áhrif niðurskurðar á framhaldsskólann og brottfall.

Fundurinn verður haldinn á Grand Hótel í Reykjavík, miðvikudaginn 17. nóvember kl. 8:15 - 10:00. Skráning nauðsynleg, fyrir kl. 17 þriðjudaginn 16. nóv. 
Þátttökugjald er 1.500 kr., sem þarf að staðgreiða. Morgunhressing innifalin.

Seltjarnarnesbær varð í dag fyrst íslenskra sveitarfélaga til að ganga formlega til liðs við verkefni Alþjóða heilbrigðis­mála­stofnunar­innar (WHO) og Lýðheilsustöðvar um Öruggt samfélag, þegar bæjarstjóri Seltjarnarness, Ásgerður Halldórsdóttir, og forstjóri Lýðheilsustöðvar, Margrét Björnsdóttir, undirrituðu samning þar um.

Vika 43 í samstarfi við Náum áttum heldur morgunverðarfund í Þjóðleikhúskjallaranum kl. 08:15 - 10.00 fimmtudaginn 28. október 2010.
Að loknu morgunþingi kl. 10 er fundarfólki boðið að sjá leikritið HVAÐ EF?

Að uppræta einelti

er þema næsta morgunverðarfundar Náum áttum hópsins, sem haldinn verður að Grand hóteli miðvikudagsmorguninn 13. október kl. 8:15-10. Nauðsynlegt er að skrá sig á fundinn: lydheilsustod.is/skraning

Árlega er 10. október helgaður geðheilbrigðismálum um allan heim. Á Íslandi hefur í áranna rás verið haldið upp á daginn með margvíslegu móti og í ár verður haldið upp á daginn í göngugötunni í Mjódd. Þema ársins er: Geðheilsa og langvinn veikindi: þörf fyrir samfellda og samhæfða þjónustu.

Undirritaður hefur verið nýr samningur um heilsueflingu í framhaldsskólum milli Lýðheilsustöðvar, heilbrigðisráðuneytisins, menntamálaráðuneytisins, samtaka framhaldsskólanemenda, Félags íslenskra framhaldsskóla og Ráðgjafanefndar um æskulýðsrannsóknir. Undirritunin fór fram í Flensborgarskóla í Hafnarfirði 1.10.10 en á sama tíma fóru fram mikil hátíðarhöld í skólanum, m.a. vegna þess að skólinn telst nú forystuskóli heilsueflandi framhaldsskóla.

Eitt af verkefnum Lýðheilsustöðvar er að vinna með framhaldsskólum landsins að velferð og góðri heilsu framhaldsskólanema undir heitinu Heilsueflandi framhaldsskólar. Á morgun verða hátíðarhöld í Flensborgarskólanum í Hafnarfirði í tilefni afþví að skólinn er fyrsti formlegi heilsueflandi framhaldsskóli landsins.  

Lýðheilsustöð og Matvælastofnun í samvinnu við Rannnsóknastofu í næringarfræði við Háskóla Íslands eru um þessar mundir að hefja könnun á mataræði og neysluvenjum landsmanna. Um tvö þúsund manns á aldrinum 18-80 ára geta því átt von á bréfi með beiðni um þátttöku, en könnunin fer þannig fram að haft verður samband við þátttakendur símleiðis og spurt um mataræði og neysluvenjur. 

Í tilefni alþjóðlegs dags sjálfsvígsforvarna verður haldin kyrrðarstund í Dómkirkjunni föstudaginn 10. september 2010, kl. 20:00 – 20:30, á vegum þjóðkirkjunnar, Landlæknisembættisins, geðsviðs Landspítala, Geðhjálpar og Hugarafls.

Morgunverðarfundur Náum áttum verður miðvikudaginn 15. sept. n.k..
Morgunverðarfundir Náum áttum hafa verið mjög vel sóttir en skrá þarf þátttöku. 

Skráning er hjá: www.lydheilsustod.is/skraning

Ísland tekur nú þátt í fjórða skipti í alþjóðlega verkefninu Göngum í Skólann. Verkefnið hófst í Bretlandi árið 2000 og hefur þátttaka aukist ár frá ári.
Átaksverkefnið Göngum í Skólann var sett formlega í gær í Fagralundi í Kópavogi af Ögmundi Jónassyni samgöngu- og sveitastjórnarráðherra.

Dagana 25-27 ágúst 2010 var haldin árleg norræn vinnustofa um forvarnir og heilsueflingu. Þátttakendur á vinnustofunni voru frá norrænum opinberum stofnunum sem vinna að málefninu. Þetta var í 26. skiptið sem slík vinnustofa er haldin og voru þátttakendur 27 frá öllum norðurlöndunum.

Alþjóðlega verkefnið Göngum í skólann í ár verður sett hér á landi miðvikudaginn 8. september næstkomandi kl. 10.00, í Fagralundi í Kópavogi, í samstarfi við Fossvogsskóla og Snælandsskóla. 
Megin markmið Göngum í skólann er að hvetja nemendur og foreldra til að ganga, hjóla eða fara á annan virkan hátt til og frá skóla en einnig að vekja til vitundar um heilsu, umhverfi og hreyfingu.

Ákveðið hefur verið að ganga til samninga við eigendur Heilsuverndarstöðvarinnar, Barónsstíg 47, um leigu á hluta af húsnæðinu fyrir nýja stofnun, sem verður til við sameiningu Lýðheilsustöðvar og Landlæknisembættisins.

Að baki eru nú tveir afar vel heppnaðir starfsdagar sem Lýðheilsustöð gekkst fyrir um Heilsueflandi grunnskóla. Þátttakendur voru á þriðja hundrað frá meira en 30 skólum. Það var Víkurskóli í Grafarvogi sem hýsti starfsdaga Lýðheilsustöðvar af myndarskap og mikilli hjálpsemi.

Lýðheilsustöð gengst fyrir starfsdögum fyrir kennara og starfsfólk grunnskóla um heilsueflandi grunnskóla, dagana 17. og 18 ágúst n.k. í Víkurskóla í Grafarvogi.

„Bagg er bögg“ er nýtt átaksverkefni Jafningjafræðslu Hins hússins, Knattspyrnusambands Íslands og Lýðheilsustöðvar til að sporna við aukinni munntóbaksnotkun hjá ungu fólki. Andlit átaksins eru Alfreð Finnbogason landsliðsmaður í knattspyrnu og Sara Björk Gunnarsdóttir landsliðskona í knattspyrnu ásamt Rúnari Guðbjartssyni og Sigríði Ólafsdóttur.

Jafningjafræðslan og stuðningsaðilar bjóða landsmönnum að fagna með sér sumrinu á götuhátíð á Austurvelli föstudaginn 16. júlí frá kl. 14:00. Þar mun fjöldi tónlistarmanna og listamanna stíga á stokk.

Foreldrar eru hvattir til að njóta sumarsins með börnunum sínum og unglingum og verja tímanum saman. Sumarið einkennist oft af útilegum, útihátíðum og sumarbústaðaferðum, en mikilvægt er að foreldrar hafi í huga að börn og unglingar undir 18 ára aldri eiga ekki erindi í slíkar ferðir eftirlitslaus. Söfnum góðum minningum í sumar - SAMAN í sólinni.

Notendur vefsíðu Lýðheilsustöðvar gætu orðið varir við það á næstu vikum að gluggi birtist á síðunni þar sem þeir eru beðnir að svara nokkrum spurningum um vefsíðuna. Með þessari könnun er verið að búa í haginn til að gera vefsíðuna enn betri og bæta við efni sem notendum finnst vanta. Það væri Lýðheilsustöð mikils virði að sem flestir tækju þátt því þannig getum við sameiginlega mótað góðan og notadrjúgan vef til framtíðar.

Undirritaður var í dag samstarfssamningur Lýðheilsustöðvar, Matvælastofnunar (MAST) og Rannsóknastofu í næringarfræði (RÍN) um framkvæmd Landskönnunar á mataræði Íslendinga.

Lýðheilsustöð lýsir yfir ánægju sinni með að lög um bann við ljósabekkjanotkun barna hafi náð fram að ganga. Stöðin hefur í samstarfi við fleiri unnið að því á undanförnum árum að vara við skaðlegum áhrifum sólargeisla á húðina, ekki síst barna.

Hluti af opinberri heimsókn forseta Eistlands til Íslands er sérstök dagskrá fyrir forsetafrúnna. Hún hafði óskað eftir að fá kynna sér lýðheilsustarf, ekki síst það sem snýr að því að draga úr ofþyngd sem og vímuvörnum. Rétt fyrir hádegi í dag komu því í heimsókn til Lýðheilsustöðvar forsetafrú Íslands, Dorrit Moussaieff og Evelin Ilves, forsetafrú Eistlands, ásamt fríðu föruneyti.

Lýðheilsustöð, og fleiri, stóðu fyrir Evrópsku ráðstefnunni Öruggt samfélag í maí sl. Nú hafa fyrirlestrar frá ráðstefnunni verið settir á vefsíðu Lýðheilsustöðvar ásamt tali allra aðalfyrirlesaranna.

Úthlutað hefur verið úr Forvarnasjóði fyrir árið 2010. Að þessu sinni er ríflega 71 milljón kr. úthlutað til 79 verkefna þar af er sérstök fjárveiting, 15 milljónir, sem ætluð er til sérstakra heilsueflingaverkefna. Alls bárust umsóknir um 129 verkefni.

Á morgunverðarþingi, sem haldið var í tilefni af Degi án tóbaks 2010, var tilkynnt að Reykjalundur hefði hlotið viðurkenningu, ,,SmokeFreeAward”, í flokki heilbrigðisstarfsmanna en hana hljóta þeir sem með baráttuvilja, framsýni og hugrekki leggja sitt af mörkum í tóbaksvörnum eða tóbaksmeðferð á Íslandi.

Á heimsþingi Alþjóðaheilbrigðismála-stofnunarinnar, 20. maí s.l., var samþykkt ályktun um hnattræna stefnumörkun til að draga úr skaðlegum áhrifum áfengisneyslu (Global Strategy to Reduce the Harmfule Use of Alcohol).

Dagur án tóbaks er haldinn 31. maí ár hvert. Sú ánægjulega þróun hefur átt sér stað að frá því mælingar á reykingum hófust hafa aldrei á sama tíma verið uppi jafnmargir Íslendingar sem hafa verið reyklausir allt sitt líf. Þessi þróun á jafnt við um karla sem konur, en ekki síst til að hvetja þær konur sem enn reykja, er þema tóbakslausa dagsins í ár: Konur og reykingar og er boðið til morgunverðarþings til að fjalla um málið í því ljósi.

Allir þurfa að hreyfa sig daglega, eftir bestu getu, og sumir þurfa meiri hvatningu til þess en aðrir. UMFÍ er að hleypa af stokkunum skemmtilegu og hvetjandi hreyfingarverkefni sem þeir nefna ,,Hættu að hanga - komdu að hjóla, synda og ganga". Lýðheilsustöð styður verkefnið en það hefst formlega með fjölskyldudegi 5. júní á Miðfelli í Hrunamannahreppi. 

Komin er út á vegum Lýðheilsustöðvar handbók um hreyfingu fyrir grunnskóla, Virkni í skólastarfi.

Hreyfing er mikilvægur liður við heilsueflingu í grunnskólum og er handbókin hugsuð sem hjálpartæki við þá vinnu.

Á morgun hefst á Grand hóteli alþjóðleg ráðstefna Lýðheilsustöðvar og fleiri um örugg samfélög. Á ráðstefnunni verður m.a. athöfn þar sem gengið er frá því formlega að Lýðheilsustöð sé miðstöð fyrir Örugg samfélög á Íslandi. Nýverið samþykkti Seltjarnarnesbær að starfa í anda Öruggs samfélags og er fyrsta bæjarfélagið á Íslandi sem það gerir.

Morgunverðarfundur Náum áttum verður miðvikudaginn 19. maí n.k..
Morgunverðarfundir Náum áttum hafa verið mjög vel sóttir en skrá þarf þátttöku. 

Skráning er hjá: www.lydheilsustod.is/skraning

Evrópusamkeppni meðal reyklausra 7. og 8. bekkja í skólum landsins skólaárið 2009-2010 er lokið, og úrslit liggja fyrir. Bekkirnir kepptu um lokaverðlaun sem er ferð til Danmerkur fyrir bekkinn sem hlýtur fyrstu verðlaun, og iPod nano fyrir alla nemendur bekkjarins sem hreppir önnur verðlaun. Í ár tóku 290 bekkir, víðsvegar um landið, þátt í keppninni milli reyklausra bekkja. Um 100 lokaverkefni bárust og hafa þau aldrei verið fleiri.

Árlega hvetur Alþjóðaheilbrigðismála-stofnunin aðildarþjóðir sínar til að halda alþjóðadag hreyfingar hátíðlegan. Tilgangur dagsins er að minna á lykilhlutverk daglegrar hreyfingar fyrir heilsu og vellíðan fólks á öllum aldri.

Hvatningarverkefni ÍSÍ, Hjólað í vinnuna, stendur yfir dagana 5.-25. maí n.k. Tilvalið er að nýta verkefnið til að taka upp heilsusamlegar ferðavenjur og efla um leið liðsandann á vinnustaðnum. Það verndar og bætir heilsuna að hreyfa sig daglega. Lýðheilsustöð hvetur því sem flesta til að fara ferða sinna á hjóli eða á tveimur jafnfljótum meðan á verkefninu stendur - og auðvitað sem lengst og mest, einnig eftir að því lýkur.

Lýðheilsustöð beinir því til landsmanna að fylgjast vel með ábendingum opinberra aðila um hvað beri að gera í aðstæðum eins og þeim sem skapast hafa vegna eldgossins í Eyjafjallajökli.

Undanfarin misseri hefur víða verið rætt um líkamsþyngd grunnskólabarna. Í slíkri umræðu er mikilvægt að tekið sé mið af bestu fáanlegu upplýsingum á hverjum tíma en nokkuð hefur borið á ónákvæmni í meðferð bæði talna og hugtaka. Lýðheilsustöð og Heilsugæsla höfuðborgarsvæðisins hafa tekið saman upplýsingar og gefið út í skýrslunni ,,Líkamsþyngd barna á höfuðborgargsvæðinu - Er hlutfall barna yfir kjörþyngd hætt að aukast?" þar sem komið er á framfæri nýjum tölum og stuttri útlistun á lykilhugtökum sem notuð eru um líkamsþyngd barna.

Í tenglsum við niðurstöðu nýrrar rannsóknar vill Lýðheilsustöð koma á framfæri að  margar góðar ástæður eru fyrir því að borða 5 skammta af grænmeti og ávöxtum á dag.

Skólaþing Lýðheilsustöðvar, 9. apríl, var mjög vel sótt og almenn ánægja með það efni sem þar kom fram. Fyrirlestrar, ásamt hljóðskrám, hafa nú verið settir á vefsíðuna.

Út er komin skýrsla með niðurstöðum kannana sem Lýðheilsustöð gerði á meðal leik- og grunnskólastjóra á Íslandi vorið 2009. Niðurstöðurnar varpa ljósi á stöðu helstu þátta sem snerta aðstæður, framboð og hvernig unnið er að hreyfingu og hollri næringu í leik- og grunnskólum landsins.

Lýðheilsustöð, í samvinnu við heilbrigðisráðuneytið og mennta- og menningarmálaráðuneytið stendur fyrir öðru skólaþingi sínu þann 9. apríl n.k. Þingið er haldið í Rúgbrauðsgerðínni og er öllum opið og þátttakendum að kostnaðarlausu.

Opnuð hefur verið vefsíðan frjáls.is sem ætluð er fagfólki, einkum á heilbrigðissviði, þar sem bent er á leiðir til að hvetja og styðja fólk til lífstílsbreytinga. Landlæknir, Geir Gunnlaugsson, opnaði síðuna formlega í dag í Heilsugæslunni í Mjódd að viðstöddu fjölmenni.

Opnuð hefur verið vefsíðan frjáls.is sem ætluð er fagfólki, einkum á heilbrigðissviði, þar sem bent er á leiðir til að hvetja og styðja fólk til lífstílsbreytinga. Landlæknir, Geir Gunnlaugsson, opnaði síðuna formlega í dag í Heilsugæslunni í Mjódd að viðstöddu fjölmenni.

Handbók um mataræði í framhaldsskólum

er komin út á vegum Lýðheilsustöðvar. Handbókin er gefin út í tengslum við verkefnið Heilsueflandi framhaldsskóli og er ætluð sem stuðningur við skólann í vinnu sinni við að stuðla að hollu mataræði nemenda og starfsfólks.

Undirbúningur fyrir sameiningu Lýðheilsustöðvar og landlæknisembættisins er hafinn. Stefnt er að því ný stofnun taki til starfa 1. janúar 2011.

Þessa dagana er átak í að benda á hættuna sem fylgir því að ungt fólk fari í ljósabekki og er því einkum beint að fermingarbörnum og forráðamönnum þeirra. Skilaboðin, undir slagorðinu Hættan er ljós, eru frá Félagi íslenskra húðlækna, Geislavörnum ríkisins, Krabbameinsfélaginu, Landlæknisembættinu og Lýðheilsustöð. Viðhorfskönnun til banns við ljósabekkjanotkun ungmenna sýnir að mikill meirihluti er með slíku banni.

Nýlega var greint frá niðurstöðum nýrra greininga á transfitusýrum  í völdum matvælum á Íslandi. Lýðheilsustöð hefur í kjölfarið tekið saman smá fróðleik um transfitusýrur sem hægt er að skoða hér.

Næsti morgunverðarfundur Náum áttum verður miðvikudaginn 24. febrúar og er yfirskriftin „Börn með ADHD - ekki gera ekki neitt“. Morgunverðarfundir Náum áttum hafa verið mjög vel sóttir en skrá þarf þátttöku. 

Skráning er hjá: www.lydheilsustod.is/skraning

Reyksíminn og Lýðheilsustöð, í samstarfi við Evrópukeppnina European Network of Quitlines, hafa nú í valið vinningshafa í verðlaunasamkeppnina Reyklaus 2009 og er það Rún Knútsdóttir sem varð fyrir valinu.

Lýðheilsustöð auglýsir eftir umsóknum um styrki úr Forvarnasjóði. Umsóknarfrestur er til 5. mars og er einungis tekið við umsóknum sem skilað er rafrænt á þar til gerðum eyðublöðum, sem hægt er að nálgast hér á vef Lýðheilsustöðvar.

Í tilefni af alþjóðlega netöryggisdeginu, 9. febrúar, verður haldið opið málþing undir yfirskriftinni ,,Hugsaðu áður en þú sendir" í Skriðu, aðalbyggingu menntavísindasviðs HÍ, við Stakkahlíð. Þar munu bæði sérfræðingar og talsmenn ungs fólks munu fjalla um örugga netnotkun út frá ýmsum sjónarhornum, undir styrkri stjórn Páls Óskars Hjálmtýssonar. Þingið er á vegum SAFT-verkefnisins sem Lýðheilsustöð er virkur þátttakandi í.

Í dag, 1. febrúar 2010, hefst árleg Tannverndarvika en í henni er lögð áhersla á málefni tannheilsu. Að þessu sinni er kastljósinu beint að tannheilsu barna en eins og MUNNÍS rannsóknin sýndi þá búa börn á Íslandi við verstu tannheilsu á Norðurlöndunum. Margt þarf að gera til að snúa vörn í sókn, ekki síst að huga almennt betur að tannhirðu barnanna. Útbúið hefur verið lifandi myndefni þar sem farið er yfir það helsta sem snýr að tannburstun barna og er það aðgengilegt hér á vefsíðunni.

Á árunum 2008 og 2009 voru gerðar hjá Matís ohf fitusýrugreiningar á 51 sýni af matvörum í þeim tilgangi að uppfæra gögn í ÍSGEM gagnagrunninum um efnainnihald matvæla. Verkefnið var unnið í samstarfi við Lýðheilsustöð og Matvælastofnun. Áhersla var lögð á að kanna magn trans-fitusýra í unnum matvælum og því voru tekin sýni af borðsmjörlíki, bökunarvörum, djúpsteikingarfeiti, mat frá skyndibitastöðum, ís, kexi, snakki og sælgæti.

Lífshlaupið

hefst 3. febrúar og eru landsmenn hvattir til að huga að daglegri hreyfingu sinni og taka þátt.

Heilbrigðisráðherra hefur sett Margréti Björnsdóttur, hjúkrunarfræðing, forstjóra Lýðheilsustöðvar frá 1. janúar til 31. ágúst 2010 en hún hefur verið starfandi forstjóri frá 9. nóvember sl. í orlofi fyrrverandi forstjóra. Margrét hefur undanfarin ár starfað í heilbrigðisráðuneytinu sem deildarstjóri og skrifstofustjóri á sviði stefnumótunar heilbrigðismála í ráðuneytinu.

Lýðheilsustöð hefur gefið út fræðsluefnið Tillögur um framboð á matvörum í íþróttamannvirkjum og hjá íþróttafélögum en markmiðið með útgáfunni er að stuðla að hollri næringu íþróttaiðkenda. Íþróttabandalag Reykjavíkur (ÍBR), Íþrótta- og tómstundaráð Reykjavíkur (ÍTR) og Íþróttasamband Íslands (ÍSÍ) standa að kynningu á efninu ásamt Lýðheilsustöð.  

Í ljósi þess að talsvert framboð er nú af drykkjarvörum og öðrum matvælum sem innihalda koffín telur Lýðheilsustöð ástæðu til að hvetja foredra og aðra til að fylgjast vel með koffínneyslu barna og unglinga. Koffín veldur útvíkkun æða, örari hjartslætti og auknu blóðflæði til allra líffæra. Einnig hefur koffín áhrif á öndun, meltingu og þvagmyndun. Mikil neysla á koffíni getur valdið höfuðverk (sem er líka fráhvarfseinkenni), svima, skjálfta, svefnleysi, hjartsláttartruflunum og kvíða.

Út eru komnir tveir fræðslubæklingar um geðheilbrigði barna, annar ætlaður unglingum og hinn aðstandendum barna og unglinga. Bæklingarnir eru unnir á vegum Barna- og unglingageðdeildar Landspítala (BUGL) í samstarfi við Lýðheilsustöð og Landlæknisembættið. Þeir verða kynntir í fyrsta sinn á árlegri ráðstefnu BUGL ,,Snemma beygist krókurinn - Bjargráð og þjónusta í nærumhverfi" sem haldinn er föstudaginn 15. janúar, kl. 08.15-16.15, í Þróttarsalnum, Engjavegi 7 í Laugardal.

Tölur um fæðuframboð á Íslandi fyrir árið 2008.
Lýðheilsustöð birtir reglulega upplýsingar um fæðuframboð á Íslandi og þó þær veiti ekki beinar upplýsingar um neyslu gefa þær vísbendingar um þróun á mataræði þjóðarinnar. 

Í upphafi árs leiða margir hugann að því hvað þeir geti gert til að stuðla að bættu heilsufari. Einn þáttur sem tengist heilsu og við getum haft áhrif á er mataræðið en með góðu fæðuvali má draga úr líkunum á ýmsum sjúkdómum. Það er því ekki úr vegi að rifja upp ráðleggingar Lýðheilsustöðvar – manneldisráðs um mataræði og nærignarefni en markmiðið með þeim er meðal annars að draga úr líkunum á ýmsum sjúkdómum og stuðla að sem bestri líðan landsmanna.