Heilinn og áhrif vímuefna á hann
Kennsluleiðbeiningar með 21 glæru sem sýna áhrif ávana- og fíkniefnanna kókaíns og kannabis á heilann og starfsemi hansA. Námsefnið og markmið kennslunnar
Námsefnið getur nýst kennurum, forvarnafulltrúum eða öðrum sem starfa með ungu fólki, einkum á framhaldsskólaaldri. Hér á eftir eru ábendingar um ýmislegt sem þeir ættu að hafa í huga sem ætla að nota glærurnar til kennslu eða kynningar í bekk eða námshópi en eru ekki kennarar.
Kennsluefnið er þrískipt:
1) Glærur á pdf-formi eða Power Point. (21 glæra)
2) Nemendaeintak í pdf (3 glærur á bls.) þar sem hægt er að skrifa glósur. (7 bls.)
3) Kennsluleiðbeiningar; farið í helstu atriði sem útskýra þarf við hverja glæru. (12 bls.)
Markmið með efninu er m.a. að gera nemendum í framhaldskólum grein fyrir þeim áhrifum sem tvær tegundir ávana- og fíkniefna (kókaín og kannabis (hass)) hafa á starfsemi heilans.
Námsefninu er skipt í þrennt:
1. Hluti: Í fyrsta hluta er sagt frá heilanum og helstu taugafræðileg atriði kynnt og útskýrð.
2. Hluti: Í öðrum hluta er greint frá áhrifum í heila og miðtaugakerfi, sem hér er kallað „umbunarkerfið“ eða „vellíðunar- og umbunarkerfið“ (reward system).
3. Hluti: Í þriðja hluta er greint frá virkni hvers efnis fyrir sig og áhrifunum sem það hefur á umbunarkerfið.
B. Atriði sem þarf að hafa í huga áður en kennslan hefst
- Ef þú ert ekki umsjónarkennari bekkjarins/hópsins sem þú ætlar að fræða um efnið, hafðu þá samband við umsjónarkennarann (hringdu eða hittu hann að máli).
- Aflaðu þér upplýsinga um aldur nemenda og um þekkingu þeirra í líffræði.
- Ræddu um efnið sem þú ætlar að kynna nemendum.
- Reyndu ef mögulegt er að hitta kennarann og greina honum frá kennslunni og námsefninu. Láttu kennaranum í té efni ef óskað er eftir því.
- Óskaðu eftir því að fá góð ráð hjá kennaranum um kennsluaðferðir – til dæmis ábendingar um til hvaða ráða sé best að grípa ef nemendur hafa í frammi truflandi hegðun eða fylgjast ekki með kennslunni.
- Lestu kennslulýsinguna yfir og æfðu þig. Mundu að framganga þín er önnur hér en þegar þú flytur erindi í hópi starfsbræðra og -systra!
C. Í kennslustofunni er gott að hafa eftirfarandi í huga:
- Kynntu þig fyrir nemendum.
- Segðu nemendum í stuttu máli frá aðdraganda þess að þú ert núna komin(n) í þeirra hóp.
- Veittu nemendum upplýsingar um starf þitt.
- Greindu frá helsta markmiðinu með fyrirlestrinum/kennslunni.
- Segðu að nemendum sé frjálst að bera fram spurningar meðan á fyrirlestrinum standi (Ath! þetta fer þó eftir tímanum sem er til ráðstöfunar).
- Reyndu þegar mögulegt er að leggja spurningar fyrir nemendur.
- Vertu viðbúin(n) því að þurfa að skilgreina eða skýra orð og hugtök sem þú notar.
D. Almennar leiðbeiningar
- Glærusýningin ætti að taka um 30–40 mínútur ef spurningar og svör eru ekki reiknuð með. Efninu mætti skipta á tvær kennslustundir.
- Myndirnar á glærunum eru skýrari ef kennslustofan er myrkvuð, a.m.k. að hluta. Varist þó að hafa svo dimmt að nemendur geti ekki haldið sér vakandi!
- Þú skalt styðjast við kennslulýsinguna þótt ekki þurfi að fylgja henni frá orði til orðs.
- Notaðu laser-bendil eða annars konar bendil/bendiprik til þess að benda á staði á glærunum. Nefndu litina til þess að auðvelda nemendum að átta sig á því sem um er rætt. Flest svæðin eru merkt með heiti í fyrsta sinn sem þau koma fyrir og þau eru aðgreind með sérstökum litum.
- Snúðu þér að nemendum þegar þú bendir á ákveðna staði á glærumyndinni, en ekki að veggnum þar sem myndin birtist.