Ráðleggingar um hreyfingu

20.2.2008

Í maí 2008 gaf Lýðheilsustöð út bækling með ítarlegum ráðleggingum um hreyfingu.

Bæklinginn er hægt að skoða er hér sem PDF-skjal (opnast í nýjum glugga), og með því að smella hér er hægt að panta bæklinginn.

Smelltu á myndirnar fyrir neðan til að stækka þær og sjá grunnráðleggingarnar í stuttu máli.

Hreyfihringurinn:

Börn og unglingar

Öll börn og unglingar ættu að hreyfa sig í minnst 60 mínútur daglega. Hreyfingin ætti að vera bæði miðlungserfið og erfið. Heildartímanum má skipta upp í nokkrar styttri tímabil yfir daginn, t.d. 10-15 mínútur í senn.

Fullorðnir

Fullorðnir ættu að stunda miðlungs erfiða hreyfingu í minnst 30 mínútur daglega. Heildartímanum má skipta upp í nokkur styttri tímabil yfir daginn, t.d. 10-15 mínútur í senn.

Sjá einnig upplýsingar um hreyfihringinn hér.

Grunnráðleggingar (textinn á myndunum):

1. Hreyfum okkur daglega: Börn og unglingar minnst 60 mínútur daglega. Hreyfingin ætti að vera bæði miðlungserfið og erfið og heildartímanum má skipta í nokkur styttri tímabil yfir daginn, t.d. 10-15 mínútur í senn. Æskilegt er að hafa fjölbreytni og gleði að leiðarljósi.
2. Hreyfum okkur daglega: Fullorðnir minnst 30 mínútur daglega. Hreyfingin ætti að vera miðlungserfið og heildartímanum má skipta í nokkur styttri tímabil yfir daginn, t.d. 10-15 mínútur í senn. Meiri hreyfingu fylgir aukinn ávinningur fyrir heilsu og vellíðan.
3. Hreyfum okkur daglega: Roskið fólk minnst 30 mínútur daglega. Hreyfingin ætti að vera miðlungserfið og heildartímanum má skipta í nokkur styttri tímabil yfir daginn, t.d. 10-15 mínútur í senn. Meiri hreyfingu fylgir aukinn ávinningur fyrir heilsu og vellíðan.
4. Hreyfum okkur daglega: Meðganga minnst 30 mínútur daglega. Hreyfingin ætti að vera miðlungserfið og heildartímanum má skipta í nokkur styttri tímabil yfir daginn, t.d. 10-15 mínútur í senn. Þjálfun grindarbotnsvöðva er sérstaklega mikilvæg á meðgöngu og eftir fæðingu.
5. Takmörkum kyrrsetu – Metum eigin hreyfivenjur. Hversu mikið hreyfi ég mig í vinnunni eða skólanum, við heimilisverkin og í frítímanum? Hvernig ferðast ég milli staða?
6. Notum göngu eða hjólreiðar sem ferðamáta. Ein einfaldasta leiðin til að auka hreyfingu í daglegu lífi er að velja ferðamáta sem felur í sér hreyfingu, svo sem að ganga eða hjóla.
7. Hreyfum okkur í vinnu og skóla. Með aukinni hreyfingu er hægt að fækka veikindadögum, vernda stoðkerfið, skerpa athygli og auka afköst.
8. Hreyfum okkur í frítímanum. Æskilegt er að takmarka þann tíma sem er varið í afþreyingu við skjá. Þannig fæst einnig meiri tími til útivistar, leikja og íþróttaiðkunar með fjölskyldu og vinum.
9. Borðum hollt fæði. Hollur matur, hæfilegt magn og reglulegar máltíðir eru grundvöllur góðra matarvenja. Góðar matarvenjur eru aftur undirstaða þess að fólk hafi orku og löngun til þess að hreyfa sig.
10. Hreyfum okkur daglega, óháð holdafari. Allir ættu að ástunda daglega hreyfingu og góðar matarvenjur, óháð holdafari.  

Senda grein