Um Geðræktar verkefnið
Verkefnið Geðrækt er fræðslu- og forvarnaverkefni um geðheilsu og áhrifaþætti hennar.
Hugmynd fyrrum notanda geðheilbrigðisþjónustunnar
Geðrækt er ætlað að fræða fólk um geðheilbrigði og geðraskanir, um forvarnir og eflingu geðheilbrigðis og draga úr fordómum. Það sem er sérstakt við upphaf Geðræktar er að það var hugmynd einstaklings, sem var fyrrum notandi geðheilbrigðisþjónustunnar.
Árið 1999 fékk hann þá hugmynda að efla þyrfti geðheilbrigði þjóðarinnar. Hann fékk til liðs við sig forsvarsmenn Landspítalans, Landlæknisembættis og Geðhjálpar ásamt fólki sem aflað gat fjár frá markaðnum og sameiginlega tókst að afla um 40 milljónum króna í verkefnið.
Það var svo árið 2000 að Geðræktarverkefni, fyrsta sinnar tegundar hér á landi, var hrundið af stað. Það var samstarfsverkefni ráðuneytis, stjórnsýslustofnana, notendafélags og markaðarins en frumkvöðullinn vann sem verkefnisstjóri þess fyrstu þrjú árin. Með verkefninu var unnið frumkvöðlastarf að skilgreiningu geðræktar; komið var með nýtt orð yfir hugtakið og markaðsett jákvæð geðheilsunálgun í einu orði - geðækt.
Haustið 2004 hlaut verkefnið viðurkenningu sem sérstaklega vel heppnað verkefni á sviði geðheilbrigðis.
Geðrækt flutti formlega til Lýðheilsustöðvar 1. september 2004. Framkvæmdaráð Geðræktar er skipað fulltrúum samstarfsaðila, þ.e. Landlæknisembættisins, Heilsugæslunnar í Reykjavík og geðsviðs Landspítala-háskólasjúkrahúss og starfar sem fagráð innan Lýðheilsustöðvar. Ennfremur hefur verið starfræktur stýrihópur í tengslum við Geðræktarverkefnið. Hann hefur komið að mörkun stefnu, aðstoðað við markaðssetningu o.fl.
Markmið Geðræktar eru eftirfarandi:
1. Bæta líðan almennings
2. Auka forvarnir og fræðslu um geðsjúkdóma og geðheilbrigði. Enn fremur er talið brýnt að forvörnum sé sinnt á öllum stigum geðheilbrigðisþjónustunnar og gerð um það víðtæk forvarnaráætlun."
a. draga úr fordómum í garð fólks sem verður fyrir geðröskun
b. auka þekkingu innan heilsugæslunnar um geðraskanir
c. auka þekkingu almennings um eðli geðraskana
d. stuðla að því að rannsóknum á árangri forvarnaraðgerða verði sinnt
3. Auka geðheilbrigðisvitund landsmanna
Heildaralgengi geðraskana á Íslandi er talið vera 22%. Samkvæmt því má gera ráð fyrir að um 50.000 Íslendingar, fimm ára og eldri, þjáist af einhvers konar geðtruflun á hverjum tíma."
a. auka tilfinningu manna og skilning samfélagsins fyrir geðheilsu,eigin og annarra
b. draga úr áhrifum geðraskana á einstaklinga, fjölskyldur og samfélagið í heild
c. auka skilning landsmanna á geðröskunum og afleiðingum þeirra fyrir samfélagið
d. stuðla að því að geðheilbrigði sé jafnsjálfsögð og eftirsóknarverð og líkamleg hreysti
4 Draga úr samfélagslegri byrði og kostnaði vegna geðraskana
a. draga úr tíðni geðraskana
b. fækka veikindadögum af völdum geðrænna kvilla
c. fækka innlögnum á geðdeildir
d. stuðla að skynsamlegri notkun geðlyfja
e. minnka óbeinan kostnað tengdan geðröskunum
f. fækka sjálfsvígum